Prome Minister Mike Eman lo bishita Sint Eustatius durante e proximo luna di november, den cuadro di e conmemoracion di 250 aña di The First Salute, un acontecimento historico cu a duna e isla un luga importante den historia di Merca. E celebracion lo tuma luga dia 16 di november 2026, un dia prome cu e prome Kingdom Summit na Sint Maarten, caminda Prome Minister Eman tambe lo participa. Eman a destaca cu Sint Eustatius, a pesar di su tamaño chikito, a desempeña un papel importante den un acontecimento cu posteriormente a haya reconocimento internacional.
Un acontecimento historico di 250 aña pasa
Dia 16 di november 1776, poco luna despues cu Merca a proclama su independencia, e bapor Mericano Andrew Doria a yega na Sint Eustatius cu e bandera di e nacion nobo. Ora e bapor a duna un saludo di cañon, Fort Oranje a contesta cu un saludo similar. E acto aki, conoci como The First Salute, ta considera e prome saludo oficial na e bandera Mericano door di un poder stranhero. E acontecimento a representa un reconocimento simbolico di e nacion nobo y a duna Sint Eustatius un posicion special den historia di independencia di Merca. Prome Minister Eman a destaca cu e historia aki no solamente ta conoci den e bukinan di historia di e islanan Caribense, pero tambe na Merca.
Celebracion cu presencia di Rey Willem-Alexander
E conmemoracion di 250 aña di The First Salute lo conta cu presencia di Rey Willem-Alexander, Prome Minister di Hulanda Rob Jetten y Secretario di Estado Eric van der Burg. Prome Minister Eman a expresa e expectativa cu representantenan di nivel halto di Merca tambe por participa den e celebracion historico.
Aruba y Sint Eustatius ta comparti lasonan historico
Prome Minister Eman a referi na Sint Eustatius como un isla ruman di Aruba, cu cual nos pais ta comparti diferente laso historico y cultural. Un di e similaridadnan special entre e dos islanan ta cu ambos pais nan ciudad capital ta carga e mesun nomber, Oranjestad. Eman a destaca tambe e bon relacion cu e representantenan di Sint Eustatius y e importancia di reconoce e contribucion historico cu e isla a haci. Pa e prome minister, e celebracion di 250 aña ta un momento di orguyo, no solamente pa Sint Eustatius, pero tambe pa e islanan ruman den Reino.
Di Sint Eustatius pa Kingdom Summit na Sint Maarten
E celebracion historico na Sint Eustatius lo tuma luga prome cu e Kingdom Summit, cu ta programa pa dia 17 y 18 di november 2026 na Sint Maarten. Durante e encuentro aki, e gobiernonan di Aruba, Corsou, Hulanda y Sint Maarten lo reuni pa intercambia vision tocante futuro di Reino Hulandes y e oportunidadnan pa reforsa cooperacion entre e paisnan.
Cada pais lo presenta su propio State of the Nation, caminda e prome ministernan lo destaca e logronan, retonan y oportunidadnan pa cooperacion nobo. E participacion di Prome Minister Eman na Sint Eustatius y Sint Maarten ta brinda Aruba un oportunidad pa reforsa su lasonan cu e islanan ruman den Caribe Hulandes y participa activamente den e dialogo tocante futuro di nos Reino.
