Tabata na luna di juni ultimo cu na Ministerio di Relacionnan Exterior di Reino Hulandes na Den Haag, a start e proceso pa tuma despedida di dje. Cu tur honor como diplomatico di pais Aruba y sirbiendo alabes interes comun di Reino, durante un sesion special hunto cu Embahadornan y diplomaticonan di Reino y di gran trayectoria, a yama Edwin Abath riba escenario pa tuma despedida di dje.
Siman pasa, a organisa un cena di despedida ofreci pa Embahador di Reino Hulandes staciona na Caracas, Venezuela, esta Robert Schuddeboom, como reconocemento pa e gran aporte brinda durante e crisis di frontera. Presente tabata un grupo selecto di directornan di varios departamento di Gobierno di Aruba.
Y finalmente, na fin di siman pasa, Gobierno di Aruba, por medio di vice minister-president, Ursell Arends, a tuma despedida di Edwin Abath. E cabes di Gabinete Wever-Croes II a tene un discurso masha elocuente, den cual a reconoce e esfuersonan y e 40 aña di trabou duro ru Edwin Abath pa nos pais. A desee tur clase di exito awor cu e ta bay disfruta di un pensioen bon mereci.
Ken ta Edwin Abath?
Edwin Bibiano Abath, t’un Arubiano lanta den e bario di Oranjestad y tin 64 aña di edad. Despues di a gradua na Colegio Arubano, el a bay studia na Hogeschool Arnhem en Nijmegen. El a termina su estudio di “Speech Terapist” y na november 1982 cu el a cuminsa traha pa Departamento di Enseñansa. Aki el a traha pa shete aña y un luna.
Su carera a continua na Departamento di Salud Publico, caminda e tabata miembro di e “Rehab Team” na Horacio Oduber Hospital y tabata encarga cu tratamento pa comunicacion pa e pashentnan cu a sufri un stroke y cu tin Aphasia of Dysarthria. Na Horacio Oduber Hospital el a brinda su experticio pa cinco aña y un luna.
For di 1990 te cu 2006, Edwin Abath tabata politicamente activo na Aruba. El a inicia como miembro di e “think-tank” pa e campaña y alabes “policy strategies” pa Partido AVP. Na 1993-1994 e tabata e “Youth Candidate” p’e partido. Ta na 1997-2005 cu Edwin Abath tabata un representante den e organo mas halto di nos isla, esta Parlamento. Tambe e tabata Secretario di Relacionnan Internacional den e organisacion di Christian Democrats of America (ODCA).
Na januari 2006, Edwin Abath tabata e Program Manager pa e programa nacional di HIV, AIDS y demas enfermedad transmiti sexualmente. Su trabou aki a termina na november 2009. Ta e mesun aña aki, pues 2009, cu Edwin Abath a huramenta como Minister Plenipotenciario di Aruba na Hulanda, caminda e tabata e representante di Gobierno di Aruba te cu november 2013.
Te cu siman pasa, Edwin Abath tabata director na Departamento di Relacionnan Exterior. Meta principal di e departamento ta pa asisti minister-president p’asina formula polisa pa cu relacion exterior adecua y efectivo pero tambe pa diseña programa pa por cumpli cu esaki. Ademas, nan ta conseha minister-president y Conseho di Minister continuamente.
Si conta cu el a cuminsa torah na november 1982, anto por conclui cu Edwin Abath a funciona no menos di 40 aña largo como un empleado publico. Den e proceso el a ocupa funcion di director, di parlamentario y hasta di Minister Plenipotenciario di Aruba.
Edwin ta casa cu Dynia G. Ch. Muller y e pareha tin dos yiu, Maurice naci na 1989 y Clyo naci na-1992.
Edwin como cantante
Edwin Abath no ta un nomber cu a resona solamente den Sala di Parlamento, den Koninkrijks Ministerraad of den top di Deparamento di Relacionnan Exterior di Reino Hulandes. E ta un nomber, cara y bos bon conoci den comunidad di Caribe Hulandes, pa su creatividad musical. E ta un cantante cu un bos unico. Asina na aña 1988 el a sali den grandi, ora a participa representando Aruba den Festival di OTI na Miami, na Merca. El a interpreta e cancion “Mi Viejo”, composicion di Edwin mes y Don Ramon Krozendijk, cu areglo di Franklin Granadillo. Pero esey no tabata tur, pasobra e mesun aña, na 1988, el a lansa un disco completo titula “Raspao”, cu a bira masha popular y un di esunnan miho bende den e tempo ey. Cancionnan cu a zona hopi na radio y alcansa posicion di honor den e Top 30 e tempo aya tabata “Cada Vez”, “Raspao” y “Dushi Morena”. Como cu Abath a opta pa sigui un carera profesional den Gobierno di Aruba, a dedica menos na canto pero si a sigui participa aki-aya den canta un jingle of compaña un orkesta.
Tocante Departamento di Relacionnan Exterior
Departamento di Relacionan Exterior ta situa awendia na Schotlandstraat #49 y tin mas o menos 15 empleado. E departamento a nace asina cu Aruba a para riba su mesun pia na aña 1986. El a conta cu varios director, manera Tico Croes, Henry Baarh, Agustin Vrolijk, Andy Lee y Edwin Abath. E terenonan cu Departamento di Relacionan Exterior ta atende cu ne ta:
- Tratado internacional y/o otro tipo di acuerdonan (MoU) cu otro pais riba diferente area
- Maneho Consular – Punto di contacto pa e Cuerpo Consular cu hurisdiccion
- Maneho di Visa
- Diplomacia Economico
- Relacionnan Diplomatico cu paisnan amigo
- Maneho di sancion
- Asesoria politico na gobierno
- Punto central di contacto den e relacion cu Ministerio di Relacionnan Exterior di Reino y henter e red di Embahada y Consuladonan General di Reino
- Tarea pa yuda harmonisa e maneho di relacionnan exterior na nivel di Reino, mantene interes di nos pais semper na bista
- Cumplimento cu Derechonan Humano (como parti di Tratadonan Internacional)
E departamento ta ekipa cu profesionalnan cu preparacion huridico, cu conocemento di relacionnan multilateral (p.e. UN) y sostene pa e seccion administrativo. Ta bon pa aclaria cu e Minister di Relacionnan Exterior di Reino Hulandes, Wopke Hoekstra, ta responsabel pa e maneho na nivel di henter Reino. E minister-president di Aruba, Corsou y Sint Maarten mester percura pa atene nan mes na e cuadro di Maneho di Relacionnan Exterior di Reino Hulandes pa medio di e DBB’s (AUA, CUR y SXM). Despues cu el a baha cu pensioen siman pasa, awendia Departamento di Relacionnan Exterior di Aruba ta bao direccion di un director suplente, esta Olivia Croes. Gobierno a pasa door di un proceso di reclutacion interno pa busca un director nobo, pero no a tuma un decision final ainda di kende lo sinta na e puesto aki.
