Diadomingo tabata un dia special, un dia di famia, unda cu Aeropuerto di Aruba a habri su portanan p’e comunidad di Aruba. Pero, e biaha aki tabata riba rampa.
Aruba e aña aki ta recorda 100 aña di aviacion unda Aeropuerto Internacional Reina Beatrix y Aruba Aviation Expo a celebra e dia memorabel aki hunto cu e pueblo di Aruba. pueblo tabatin e oportunidad di ta riba pista pa waak tur accion y operacion di Aeropuerto Internacional Reina Beatrix. asina Marylin Feliciana, Branding & Marketing Specialist di Aruba Airport Authority a cuminsa na bisa.
Sigur un momento unico y tambe nan tabatin e reglanan na nan luga, und acu e comunidad tabata por a yega cerca pa nan experiencia un tiki mas di kico ta e mundo di aviacion y e tur e partinan operacional hunto cu e Airport stakeholdernan.
Esaki no ta e prome biaha cu ta tene un Aruba Aviation Expo. Tabata na 2006 cu a tene un Aruba Aviation Expo y e diferente stakeholdernan a bin hunto pa asina pensa kico por haci pa trece e comunidad di Aruba cerca. Asina e idea a nace pa bin c’un Aruba Aviation Expo, unda cu por enfoca tambe riba e futuro generacion di Aruba, siña nan kico tur ta e oportunidadnan cu tin den e mundo di aviacion, treciendo nan mas cerca di loke tin cu nan por bay studia den e mundo di aviacion. Mundo di aviacion ta uno interesante y atractivo. cu un sin fin di posibilidadnan.
Parti paden nan tabatin un flight simulator, unda cu e muchanan por ta piloot y siña con pa baha e avion na Aruba. tambe tabatin photobooth pa saca potret di un dia asina memorabel.
Riba rampa tambe tabata por a mira diferente avion, entre otro avion di Warda Costa.
Jurgen Benschop, Chief Operating Officer di Aeropuerto Internacional Reina Beatrix, a splica cu e evento aki tabata un preparacion di varios luna, pa nan por duna bek na comunidad den cuadro di 100 aña di aviacion na Aruba.
E dia tabata un combinacion di evenementonan n’e parti paden di e hangar pero tambe un exhibicion di no solamente avion – y helicopternan. Tambe tabatin ekiponan cu ta relata n’e operacion di aeropuerto, por ehempel warda costa ora di rescate riba lama, Rampenbureau na ora di emergencia.
Benschop tambe a indica cu tabatin un bustour, unda cu e comunidad por tin un bista tambe di kico tur ta tuma luga n’e parti pafo di aeropuerto. Un momento unico, segun Benschop.
A logra haya participantenan local cu a bin cu nan avionnan, pero tambe a haya Coast Guard, cu a bin cu su avionnan, Eazy Air Medic Flight cu a bin cu henter su ekipo di Bonaire, pa asina duna un demostracion di kico nan trabou ta den cooperacion cu Servicio di Ambulance na Aruba. Asina tabatin tambe Galloway cu FMSA cu ta duna servicio riba tereno di airport. Cuerpo di Bombero tambe tabata t’ey cu nan crashtrucknan nobo.
Como parti di e planning di un aeropuerto internacional, mester a organisa e evento unda cu a garantisa e operacion ta sigui na un manera sigur y ten’e habri pa publico, cu permiso excepcional di Departamento di Aviacion Civil, cumpliendo cu tur e reglanan di siguridad.
Joost Meijs, Chief Executive Officer di Aruba Airport Authority a indica cu diadomingo tabata un dia hopi special pa Aruba, cu ta celebrando 100 aña di aviacion. Un sector hopi importante pa nos isla. E exposicion aki ta un sorto di regalo di e mundo di aviacion di Aruba pa su comunidad.
Un evento asina ta hopi importante pa Aeropuerto Internacional Reina Beatrix. Aruba completo a bin cera conoci un poco mas di cerca cu e mundo di aviacion di Aruba y tambe cu e parti operacional di aeropuerto di Aruba.
Sin biahero y principalmente e biahero local, Aeropuerto Internacional Reina Beatrix no tabata por a existi. Esaki tabata e manera con mundo di aviacion local a duna bek na e comunidad di Aruba.
Por a mira basta movecion riba e plataforma unda cu e diferente stakeholdernan a bin hunto pa asina n’e manera aki, duna bek n’e comunidad.
E ex-empleadonan di ALM y tambe Air Aruba a participa n’e exposicion. Conhuntamente nan tabatin hopi conocemento, experiencia y historia di aviacion di Aruba y Antia.
