Diahuebs mainta empleadonan di SVb na Vondellaan a bini hunto pa honra Marlin Krozendijk-Penja. Minister di Turismo y Salud Publico, Dangui Oduber, a yama Marlin danki pa tur e añanan di servicio duna na pais Aruba.
Diahuebs, despues di 42 aña di servicio na SVb, Marlin a baha cu pensioen.
Marlin a cuminsa traha pa SVb riba 18 di augustus na aña 1980, e tempo ey ainda na SVb Antias te cu aña 1986, unda despues cu Aruba a ricibi su Status Aparte, SVb Aruba a bira oficial.
Marlin semper a traha den Departamento di Finansas y na aña 2009 Marlin a acepta un reto nobo pa ehecuta funcion di chef di departamento di Inning. Akinan Marlin a keda traha te riba su ultimo dia di trabao na SVb Aruba.
“Marlin masha danki pa bo contribucion valioso na SVb y e comunidad di Aruba en general. Disfruta di e pensioen bon mereci”, asina Minister Oduber a bis’e.
