Departamento di Integracion, Maneho y Admision di Stranhero (DIMAS) a anuncia dialuna cu entrante awe diaranson, lo habri su portanan bek pa atende publico. Aki nan lo ta atendiendo esunnam cu no por a entrega nan peticion online, esta esunnan cu no ta handig cu e sistema electronico.
Mainta trempan un grupo di persona a yega na DIMAS desespera pa haya sa mas over di nan papel. Nan ta den un incertidumbre pa con e sistema nobo ta traha, pero tambe cu nan ta wardando pa lunanan caba pa haya nan permiso of otro documentonan. Cuerpo Especial Arubano (CEA) tabata laga esunnan cu tin afspraak pasa paden, mientras tabata splica esunnan sin afspraak cu nan no por drenta. Claro cu esunnan sin afspraak no ta contento pa esaki y a mustra nan malcontento.
Clientenan cu afspraak tabata yega DIMAS, bay paden y entrega nan peticion pa permiso of otro tipo di documento cu nan mester entrega. Personal di CEA a pone tur hende para den un fila y mantene distancia social di 1.5 meter, mientras tabata check ken tin afspraak y na mes momento purba trankilisa tur presente.
Tin hende sa kico pa haci online, mientras cu otro no. Clientenan cu a yega tabata pa reclama nan permiso cu mester ta cla desde aña pasa na october. Pa diferente motibo hende ta yega na DIMAS. Un señora no ta contento p’e situacion cu e ta pasando den dje, pasobra a nenga su permiso. Desde lunanan e ta purbando di haya su placa for di Departamento di Impuesto (DIMP), pero ta sinti cu nan ta mand’e di cashi pa muraya.
Hopi hende no ta compronde e sistema nobo di DIMAS unda cu lo atende solamente esunnan cu tin afspraak. Pero pa motibo cu tin hende cu kier sa con ta para cu nan papelnan ta opta pa acudi na DIMAS buscando informacion.
