“Aruba ta den un situacion financiero hopi precario. E crisis di COVID-19 a causa un daño enorme na nos economia, y e recuperacion lo tuma hopi tempo. E enfoke pa loke ta e propuesta y rekisitonan cu Hulanda a pone pa e di tres pago di financiamento di likides ta riba e termino corto, e proximo tres lunanan cu ta bin. Sinembargo, no mester lubida, cu aunke frontera di Aruba a habri, no por spera cu nos economia lo sigui na e nivel caminda nos tawata prome cu COVID y nos lo sigui ta dependiente di ayudo financiero pa un tempo largo, posiblemente hasta den 2021”, asina Michelle de Groot, Director di ATIA a manda un rato pasa den un relato pa prensa.
E efectonan di e crisis no solamente a afecta comercio y nos economia, pero tambe a pone un peso adicional riba nos sistemanan social AZV y SVb. Entrada di e servicionan aki a baha cu consecuencia cu e AOV/AWW ta bou di presion y no por sigura esaki mas riba termino relativamente corto.
Ademas, companianan cu ta ricibiendo subsidio di salario aworaki ta wantando trahadonan artificialmente na trabou cu e ayudo aki, pero asina cu e ayudo no ta disponibel mas, lo no por wanta e mesun cantidad di trahadonan den servicio y restructuracion lo ta inevitabel. Flexibilisacion lo ta necesario pa companianan por haci e restructuracion necesario pa por sobrevivi.
ATIA ta compronde cu e decision cu si ta bay di acuerdo cu e rekisitonan di Hulanda of no, no ta facil. Apesar cu ATIA ta di acuerdo cu reformanan ta sumamente necesario pa crea un Aruba mas resiliente, tambe ta asina cu den un consenso, tur partido envolvi mester ta sinta na mesa y mester por tin un voz den e discusion riba decisionnan cu lo afecta un pais. Pa e motibo aki, ta di aplaudi cu Prome Minister a logra habri e dialogo cu Hulanda.
E incertidumbre cu e retraso aki ta creando pa comercio ta indeseabel, mirando tur otro factor cu ta creando incertidumbre den e tempo dificil aki. Ta lamentabel cu gobierno no a haci e propuesta cu nan a manda pa Hulanda publico of pidi input concreto di parti stakeholders. E cumbre cu a tene siman pasa ta un bon iniciativa, pero den un grupo grandi asina, no ta posibel pa berdaderamente duna solucionnan concreto cu Gobierno por uza den su propuesta.
ATIA ta urgi gobierno pa purba yega na un solucion satisfactorio pa ambos pais lo mas pronto posibel pa asina comercio di Aruba por planea pa e siguiente lunanan con lo sobrevivi y saca economia di Aruba dilanti na e miho manera posibel.
