Escalacion: Atrobe Polis mester a calma tension na Guarda Nos Costa

2743

Desde ayera tin tension na Guarda Nos Costa cu e indocumentanan. Esunnan deteni no ta contento cu nan situacion y ta haci esaki door di protesta cu hopi rabia y ta haciendo destruccion. Ta laga nan sali pa cana un rato pafo, pero ta saca hendenan di cel pa cel.

Personal di Guarda Nos Costa a bin cu un maneho diferente, unda cu no ta laga tur hende hende sali pafo na mes momento. A scoge pa haci esaki pa evita cu cosnan sali for di man. No tin suficiente personal, unda cu tin 4 hende ta traha pa shift y tin di controla esnan cera na Guarda Nos Costa. P’esey ta pidi asistencia di polis pa reforsa y mantene e siguridad.

Hopi Polis yegando: Protesta cu hopi rabia y destruccion na GNC atrobe

Posted by 24ora on Wednesday, July 22, 2020

No por manda e Venezolanonan bek pa nan pais, pasobra no ta yegando un acuerdo cu Venezuela. Ni via consulado no ta regla e situacion pa manda nan bek Venezuela. Tin hende cu boto y ta dispuesto pa hiba nan Venezuela. Mester ta regla esaki pa sali for di Aruba legal y drenta Venezuela legal.

Un mama Colombiano ta preocupa pa su yiu, kende a bin pa vakantie pero a gar’e cu su estadia venci. El a splica cu pa 2 luna caba su yiu ta cera y den henter e protesta e no ta participa. El a sigui indica cu e ta para como garantia y asina cu nan bisa ki dia e yiu mester bandona Aruba, e mes lo percura pa hiba su yiu aeropuerto.

Hopi unidad di Polis tabata presente na Guarda Nos Costa pa yuda mantene e ordo. Algun Polis tabata papia cu e hendenan pa purba calma nan. Algun di nan a mustra cu ta riba corchon nan ta drumi, tambe nan tabata mustra nan malcontento. Nan ta acusa Minster Bikker di ta responsabel pasobra e no ta busca un solucion, pero tambe a insulta Trudy Hassell. Hefe di e seccion di cachonan K-9 di Polis, esta Sub Inspector Richard Kramers, tambe a presenta na e sitio pa papia cu e stranheronan indocumenta. Nan a bisa e superior di Polis cu hopi cos no ta bon eyden.