Ora bo bay Corsou awendia bo por mira cu tin varios desaroyo tumando luga den centro di ciudad. Hopi proyecto di embeyecemento manera tambe diferente tipo di trabaonan di mantencion y renobacion andando. Gwendell Mercelina, parlamentario di Corsou (PNP) miembro di Partido Nashonal di Pueblo (PNP) ta splica nos cu centro di ciudad ta e curason di e pais caminda bo ta mira e parti turistico – esun mas esencial of e pilar cu ta tene GDP.
Ora cu bo mira e desaroyo cu Corsou ta riba dje bo ta sintie mas y mas den centro di ciudad Willemstad. Keto bay e curason di e ciudad ta creciendo y tin desaroyo den diferente ambito cu den tempo di pandemia a keda afecta fuertemente, manera companianan of tiendanan grandi cu a bay pa motibo di esaki. Cu e desaroyo turistico awor tin hopi tienda nobo lantando como tambe empresarionan local den Punda tambe ta mira con nan ta haci e mas accesibel pa tur hende, manera pa hende cu limitacion fisico riba rolstoel. E infrastructura ta desaroyando y ta completamente otro.
DESAROYO INTERESANTE
Tin varios construccion andando manera por ehempel condominio den area di Punda, tin cierto incentiva fiscal cu ta duna por ehempel Tax Holiday, papiando den e caso aki pa proyectonan grandi manera hotel den cuadro cu ta hayando. E desaroyo sigur mas tanto den ultimo tempo ta cu mayoria di monumento den centro di ciudad mes, e parti ariba a cuminsa huur apartamento manera Airbnb of pa hende biba. E desaroyo aki no tabata tin prome, segun Mercelina.
“Mayoria di e doñonan di e monumentonan tabata uza esaki pa mangashina, pa warda material sigur di nan tiendanan. Eseynan ta desaroyonan cu bo ta mira ta interesante pa trece bida bek sigur den parti di Punda, pasobra Otro Banda semper tabata tin hende ta biba.” Bo ta mira e diferencia di movecion con hasta a pesar di pandemia, con e grupo di comerciantenan di Otro Banda toch tabata tiki mas resiliente cu comerciantenan di Punda. E efectonan aki ta desaroyonan cu bo ta mira na momento cu bo atrae vivienda den bo centro di ciudad, e ta bira mucho mas atractivo. Tin hopi area y bario cu tin hopi Boutique Hotels, apartamento pa studiante y por mira con e areanan aki ta floreciendo durante ultimo tempo.
E Boutique Hotels hunto cu e parti di horeca ta trece un otro dimension pasobra tin hopi restaurant, tin algun ‘semi’ Nightclubs unda tin un bida nocturno toch hopi vibrante. Algun siman atras tabata tin Curacao Blues Festival den e area aki y bo ta mira e dinamismo cu esaki ta treciendo pa Corsou hunto cu incentivo di varios otro proyecto tambe.
