Deporta pa di 5 biaha: Aruba ta keda e isla preferi

For di momento cu a gara e grupo di 11 Venezolano indocumenta e siman aki na Sero Colorado, a constata cu algun di e caranan tabata mustra conoci. For di Guarda Nos Costa a obtene informacion cu en berdad, ya a deporta shete di e diesun detenidonan aki caba den pasado. Pues 7 di 11 ta cara conoci cerca Guarda nos Costa.

Diadomingo anochi a detene un total di diesun persona na Sero Colorado. Ta trata di nuebe hende homber y dos hende muhe. Awo, specificamente di e diesun, shete tabata deteni caba un biaha na Guarda Nos Costa y a deporta nan pa Venezuela. Loke mas ta hala atencion ainda ta cu entre e shete repeat offenders aki tin un hende muhe cu ta su di cinco biaha cu ta cay den man di autoridad door di purba drenta Aruba di forma ilegal.

E señora aki procedente for di Venezuela stima Aruba masha. E unico cos ta cu e no ta yega aki riba un vuelo comercial normal cu su paspoort na man, sino ta opta pa bin Aruba di forma ilegal den “lancha rapida” for di Punto Fijo pa Aruba. E biaha aki el a purba sconde den mondi na Sero Colorado, a cay den lodo y a lastra na suela. Pero no obstante tur intento, autoridad a logra gar’e y atrobe e ta den man di Guarda nos Costa pendiente su deportacion.

E situacion aki ta pone miembronan y liderazgo di e autoridadnan cuestiona si e manera con ta manehando e asunto aki ta esun di mas efectivo. Kiermen cu cada bes ta haci uzo di recursonan di Pais Aruba pa captura, procesa, wanta deteni (cuminda, cuido medico, etc.) individuonan cu manera bo manda nan bek, ta regresa den e prome chens cu nan haya y asina e circulo ta cuminsa di nobo.

Ta bira mas dificil ainda door cu frontera cu Venezuela ta cera. E ultimo vuelo humanitario, caminda e gran mayoria di pasahero lo tabata personanan deporta, no por a bay door pa motibo cu Venezuela tin lockdown estricto y no a permiti e vuelo pa drenta. Mientras tanto, tur e hendenan aki mester a bay facilidad di Guarda Nos Costa bek.

E personanan indocumenta ta pidi polisnan pa por fabor no manda nan bek pa Venezuela pasobra nan ta pasando den miseria. Nan tin yiunan pa cria of tin famia malo. Polisnan ta haya nan ta uza nan man represivo pero tambe tacticanan social pa scucha e dolornan aunke cu ta dificil mustra comprension pa tur reto socioeconomico di paisnan hopi mas grandi cu nos.

E ta un presion adicional riba facilidadnan, riba personal y riba recurso ya cu detenidonan no ta bin na remarke pa ‘meldplicht’. Esaki ta e opcion caminda por bay keda na cas di un persona na Aruba cu ta firma como garantia. E ta keda eynan mientras ta warda su fecha di salida bou e condicion cu e ta presenta, por ehempel, un bes pa siman na sede di Guarda Nos Costa.

Mientras tanto top di e departamentonan concerni ta kere cu ta un bon pa e poder legislativo tuma carta den e asunto y proporciona e hermentnan legal cu lo permiti nan pa anda cu esunnan cu ta purba drenta Aruba di forma ilegal cu mas peso y cu un caracter penal. Consecuencia mas pisa pa nan acto por pone cu e personanan aki ta pens’e dos biaha prome cu sigui purba.

Noticia relacionaMas for di e autor