Despues di papia y duna diferente opcion of sugerencia pa mehoracion, ainda e situacion na e departamento di rijbewijs ta caotico y esnan encarga no por keda cla cu e asunto aki. Oficina situa na Sta Cruz caminda ta encarga pa renoba, pasa rijbewijs y demas servicio, hendenan ta yega pa haya servicio di pasa rijbewijs pero ta topa cu obstaculonan.
Dialuna mainta 24ora.com tabata den combersacion cu Rolando Maduro ( instructor y ex-polis ) presidente di asociacion di rijbewijs como tambe Thomas Ruiz ( ex-polis ) tambe cu amplio conocemento locual ta trata examen di rijbewijs, pa duna un poco splicacion kico ta e problema tumando luga.
Rolando Maduro ta splica cu un biaha mas nan ta para dilanti bureau di examen di rijbewijs ( BER ) pa vocifera nan preocupacion. Maduro a duna di conoce cu siman pasa diaranson ( juli 8,2020 ) e asociacion tabata presente den reunion na Cocolishi cu representante y conseheronan di Minister di Husticia, como tambe mando policial Vanessa Kock compaña pa su conseheronan pa discuti varios punto cardinal.
Pa nan sorpresa den reunion ta informa cu despues di algun tempo cera, e oficina ta reanuda examen, y ta informa nan via email cu e candidatonan no mester bini cu auto, y cu e oficina mes lo pone auto disponibel.
Durante reunion a pidi pa haya e protocol di DVG cu nan tin cu atene nan mes na dje pero lamentablemente te cu dia di awe no a haya esaki den nan man pa mira. Ta sinti cu aunke tin contacto cu su persona, ta parce cu ta papia of dal contra un muraya y bin bek.
Segun Maduro, a keda palabra cu e uzo di e vehiculo sugeri pa pasa rijbewijs cu ne ta keda liber di escogencia. A splica cu mester tene na cuenta cu e instructornan ta bende un pakete cu ta inclui un vehiculo cu nan ta custuma cu ne ora di haya les. No ta mira un problema pakico nan ta nenga di uza vehiculo di instructornan. E incidentenan aki a tuma luga riba diabierna.
A tuma contacto cu Tromp ( cu ta esun encarga pa cu e maneho ) na oficina di rijbewijs y a indic’e riba e punto y cord’e cu e tambe tabata sinta na mesa na momento cu a palabra riba e uzo di vehiculo di escogencia. A cuestiona dicon no a manda protocol pa tur hende haya y dicon ta haci dificil pa cu uzo di vehiculonan di instructor mientras diabierna e situacion ta keda igual caminda ta nenga e uzo di otro instructor na momento di pasa rijbewijs. “E situacion awor ta un “berebere,” Maduro a bisa.
Hasta e asociacion a tuma contacto cu centraal examen bureau na Hulanda pa haya un splicacion riba e procedura cu nan a tuma na momento di pasa rijbewijs, tambe a tuma contacto cu Corsou ( cu tambe tin nan asociacion ) como tambe Boneiro y tur a duna mes contesta. E candidato ta keda uza e mesun vehiculo, ta desinfecta e vehiculo, e stuurwiel y area caminda e examinator ta bay sinta, uzo di mondkapje ta un obligacion pa e candidato y e examinator. No por compronde dicon no por keda riba e mesun sistema y te ainda no por saca afo ken of unda nan a bin cu e idea maraviyoso aki cu ta exclui esnan di e asociacion.
E instructornan ta siña e candidatonan tambe pa drenta y sali di e cura di e departamento, pero awo esaki ta cera y no por train e candidatonan den esaki.
Thomas Ruiz di su banda a bisa cu e lista di espera ta largo, debi na un problema structural den e departamento. Ta tuma decision ad hoc sin scucha e instructor, ta yama e departamento pero no ta haya contesta, tin algun mil email cu e personal no a logra procesa ainda. Y asina tin hopi problema mas cu no a logra soluciona ainda pa e departamento por haci su trabou debidamente.
