Denny’s Aruba a cera su portanan prome cu su apertura oficial

5331

Problema financiero mara na pago atrasa di huur di e localidad parce a bira final di e storia cortico di e restaurant popular Denny’s na Aruba. E intencion tabata pa habri e bar dilanti y pa habri 24 ora pa dia pero nunca a keda cla cu e permisonan necesario di Gobierno. Tambe funcionamento na Aruba pero for di Corsou ta un reto semper. Awo cu reto den pago di huur, a dicidi di cera e restaurant y manda riba 20 trahado cas sin salario. 

Tabata na fin di januari 2019 cu Tara Prins, un comerciante di Corsou, a anuncia apertura inoficial di Denny’s Aruba den Cove Mall net dilanti Holiday Inn Resort & Casino. Famia Prins a maneha Denny’s cu exito pa algun decada na Corsou y despues di a cer’e na nos isla bisiña a pensa di crusa lama y ofrece e mesun calidad y servicio pa e pueblo di Aruba. A imagina cu Aruba ta maneha hopi mas turista Mericano compara cu Corsou, pues a pronostica cu aki e restaurant lo ta hopi mas exitoso. Riba dje e locacion, dilanti Highrise Hotels, tambe lo mester a traduci den un mercado mas grandi ainda y di ta mas cerca di e clientenan. E plan di negoshi lo ta destina den su mayoria pa turista pero tambe pa nos localnan. 

Denny’s, tambe conoci como Denny’s Diner ta un frankisia di restaurant Mericano. Ta opera riba 1700 restaurant estableci rond mundo, entre otro na Merca, Puerto Rico, Guam, CanadaCosta RicaEl SalvadorMexicoRepublica Dominicana, GuatemalaHapon, HondurasNew ZealandQatarFilipinas, IndonesiaUnited Arab EmiratesCorsou, Australia y Inglatera. A funda Denny’s na aña 1953 y desde 1963 a cuminsa habri tur parti di mundo como “franchise”. Nan oficina principal ta situa na South Carolina. Aña pasa e compania tabatin 541 miyon dollar na entrada.

Doño di The Cove Mall, esta Milton Berlinski, a sigura cu a busca tur forma pa yega na un acuerdo cu e restaurant pero nan no kier a acepta ningun opcion. A nota cu deliberadamente a opta pa no habri despues di Covid-19, mientras cu tur otro restaurant y otro tiendanan si a habri normal y a sigui ofrece servicio. Claro cu como doño di edificio nan tabata semper dispuesto pa yega na acuerdo di reduccion di huur incluyendo alivio completo. Pero e restaurant a opta pa no acepta ningun oferta. Awe a cuminsa baha tur e borchinan di e nomber riba e edificio.