Impact Hub Aruba a logra un reconocemento importante den Caribe Hulandes, despues di ricibi e suma mas halto di financiamento entre e organisacionnan selecciona den Categoria 4 di e programa di subsidio di Ministerio di Asuntonan Social y Empleo di Hulanda. E seleccion ta marca un paso significativo pa e fundacion Arubano, cu durante e proximo cuatro aña lo lidera un iniciativa cu ta conecta patrimonio historico cu desaroyo social y economico inclusivo.
E financiamento ta forma parti di e ‘Subsidieregeling Maatschappelijke initiatieven trans Atlantisch slavernijverleden voor het Caribisch deel van het Koninkrijk’, un programa cu ta apoya conocemento, conscientisacion y reconocemento di e pasado di sclavitud y su influencia riba nos sociedad actual.
E programa ta forma parti di e compromiso di Reino Hulandes despues di e disculpa oficial pa e pasado di sclavitud. Categoria 4 ta e nivel mas grandi di financiamento, cu subsidionan di te cu USD 500,000 pa iniciativanan di maximo cuatro aña.
Un historia cu nos no por permiti pa perde
Den un mundo cu ta cambia rapidamente, e conexion entre nos historia, patrimonio y identidad no semper ta evidente. Hopi di e historianan cu a contribui na forma nos sociedad ta transmiti oralmente, di generacion pa generacion. Cu tempo, nos ta core e riesgo di perde parti di e memoria colectivo aki si nos no documenta y comparti e conocemento.
Mientras Aruba ta sigui desaroya bou di influencia internacional y cambio cultural, ta bira ainda mas importante pa futuro generacionnan compronde e historia y experiencianan cu a contribui na forma nos identidad.
E historia di sclavitud cu nos conoce awe ta basa pa gran parti riba perspectiva colonial, cu enfasis riba opresion y desigualdad. Pero tin tambe historianan cu merece ta conta: di resistencia, resiliencia, creatividad y hende cu a desafia nan circunstancianan pa crea cambio. Historia di ‘zelfredzaamheid’, iniciativa propio y e buskeda pa independencia economico, cu nos kier redescubri y investiga den nan contexto historico, pa compronde con e caracteristicanan aki ta relaciona cu e spirito di emprendemento cu nos conoce awe.
Di patrimonio historico pa balor pa futuro
Durante e proximo cuatro añanan, Impact Hub Aruba lo traha pa acerca e historia di sclavitud y su herencia na comunidad, creando espacio pa documentacion, dialogo, conocemento y participacion entre generacionnan.
Un pregunta central ta: con nos por conecta nos herencia di sclavitud cu identidad, resiliencia y oportunidadnan social, cultural y economico pa futuro di Aruba? E iniciativa lo explora e conexion entre historia di sclavitud, ‘zelfredzaamheid’, creatividad y emprendemento, y con e conocemento aki por contribui na educacion, industria cultural y creativo, y participacion economico local.
E comunidad lo ocupa un rol activo den e proceso, cu respet pa integridad di e historia y e experiencianan di generacionnan anterior.
Mary-Ann Falconi-Rasmijn, directora di Impact Hub Aruba, ta splica: “Pa nos, esaki ta mas cu un proyecto historico. Ta un oportunidad pa redescubri historianan cu merece wordo conta, reconoce e resiliencia y determinacion di generacionnan anterior, y compronde con e pasado a contribui na forma nos identidad. Nos kier explora con e conocemento aki por inspira creatividad, iniciativa propio y oportunidadnan nobo pa futuro di nos isla.”
Impact Hub Aruba como conector
Pa Impact Hub Aruba, e seleccion aki ta confirma su capacidad como organisacion Arubano pa lidera iniciativanan di largo plaso y conecta comunidad, diferente sectornan y partnernan local, regional y internacional.
Cu e programa aki, Impact Hub Aruba lo reuni conocemento historico, creatividad y emprendemento pa conserva patrimonio, conecta generacionnan y explora oportunidadnan nobo pa comunidad Arubano.
Durante e proximo lunanan, Impact Hub Aruba lo comparti mas informacion tocante e programa, su colaboracion y e oportunidadnan pa comunidad participa.
Tocante Impact Hub Aruba
Impact Hub Aruba ta parti di Impact Hub Network, un red global di organisacionnan activo den emprendemento, innovacion y cambio social. Na Aruba, e organisacion ta construi ecosistemanan y conecta comunidad, sector publico y priva, emprendedornan, conocemento y oportunidad. Door di programanan y colaboracion local, regional y internacional, Impact Hub Aruba ta contribui na desaroyo social y economico inclusivo y duradero pa Aruba.
