Prome Minister Mike Eman ta explorando e posibilidad pa Aruba, Corsou y Boneiro uni nan esfuersonan pa desaroya un solucion comun y duradero pa e maneho di desperdicio. E iniciativa aki ta enfoca riba reciclahe, procesamento di desperdicio y e probecho di materialnan cu tin balor economico, cu e posibilidad pa establece un instalacion grandi di procesamento cu por sirbi e tres islanan.
Durante su bishita na Corsou, Prome Minister Eman a sostene un reunion cu e directiva di Serlikor, como parti di e esfuersonan pa fortalece colaboracion regional den e area di medio ambiente y maneho di desperdicio.
E Prome Minister a splica cu durante dos bishita na Hulanda, a explora e posibilidad pa Aruba tuma un rol den buskeda di un solucion pa e retonan ambiental cu e tres islanan ta enfrenta. E retonan aki ta inclui e manera cu desperdicio ta colecta, procesa y finalmente elimina sin causa daño na medio ambiente.
Un di e obstaculonan principal ta e costo halto di e instalacionnan pa procesa desperdicio. Segun Eman, tecnologianan manera incineracion y procesamento di e materialnan pa crea producto nobo ta rekeri inversion grandi, specialmente ora un isla individualmente no tin suficiente cantidad di desperdicio pa haci e operacion economicamente posibel.
Pa atende e situacion aki, e pensamento ta pa Aruba, Corsou y Boneiro combina nan capacidad y cantidad di desperdicio, identifica e materialnan cu por recicla y determina cua producto mester pasa door di otro forma di procesamento.
Posibel colaboracion cu HVC na Hulanda
Den e proceso aki, e empresa publico Hulandes HVC por hunga un rol importante. E empresa, cu ta presta servicio na aproximadamente 50 gemeente na Hulanda, ta un posibel partner pa explora solucion tecnico y economico pa e tres islanan.
Durante e encuentronan na Boneiro y Corsou, Prome Minister Eman a observa cu e instancianan concerni ta comparti e interes pa busca un solucion comun.
E intencion ta pa durante un proximo bishita na Hulanda, e tres islanan por avansa den e combersacionnan cu HVC y explora e posibilidad pa yega na un acuerdo di principio.
Area di refineria como posibel luga pa centro di desperdicio
Un di e posibilidadnan cu ta considera ta pa establece un instalacion grandi di procesamento di desperdicio den e area di ex-refineria na Aruba.
E instalacion aki lo por concentra diferente actividad, manera separacion di desperdicio, reciclahe, procesamento di material pa crea producto nobo y exportacion di productonan cu tin balor economico.
Segun Prome Minister Eman, e iniciativa por involucra varios empresa publico di e tres islanan, HVC y eventualmente empresa priva, incluyendo EcoTech na Aruba.
E colaboracion lo por permiti pa combina e conocemento tecnico y experiencia di diferente instancia, mientras cu e volumen di desperdicio di e tres islanan por contribui na un operacion mas eficiente.
Intencion pa firma un acuerdo prome cu final di aña
E meta ta pa prome cu final di 2026, Aruba, Corsou y Boneiro por yega na un acuerdo di principio, den forma di un Memorandum of Understanding (MoU), cu ta establece e intencion pa traha hunto riba un solucion duradero pa maneho di desperdicio.
E acuerdo lo por forma e base pa un colaboracion mas amplio cu HVC y otro partner, cu atencion tanto pa e exigencianan ambiental como pa e posibilidadnan economico.
Pa Prome Minister Eman, e iniciativa no ta solamente un oportunidad pa mehora e maneho di desperdicio y proteha medio ambiente, sino tambe pa explora un actividad economico adicional pa Aruba.
E vision ta pa transforma un reto ambiental cu e tres islanan ta comparti den un oportunidad pa colaboracion regional, innovacion y desaroyo economico sostenibel.
