Ernst Mohamed, director y doño di Bio Fresh Painting and Projects Consultancy, a presenta e prome diesseis colo di verf inspira pa Aruba, un proyecto cu el a soña cu ne pa varios aña.
E coleccion ta inclui tono manera Banana Hasa, Bandera Blauw, Aloe Berde, Ponche Crema, California Dunes y Pisca Blauw, cu e meta di amplia e palet te cu un carta completo di colo di Aruba den dos aña.
Mohamed a splica cu e idea a nace for di pregunta frecuente di cliente, cu tabata desea tin colo cu ta representa Aruba, en bes di depende solamente di palet di colo internacional. Despues di hopi trabao pa identifica, scan y verifica e tonalidadnan, e empresa a logra prepara e prome foyeto cu diesseis colo.
Segun Mohamed, e proyecto ta un logro personal y un mensahe pa hoben: Sigui cu bo soño, tin perseverancia y no laga obstaculo desanima bo. El a invita publico pa conoce e coleccion na Bio Fresh Paints, na Italiestraat, situa na Orange Plaza Mall. Si bo no sa unda esey ta, simplemnte bay na e restaurant Red Fish, y sigui te na e parti patras di e plaza.
E prome colo ta sali na benta awe y dia 10 di october. Ademas, e empresa a anuncia un promocion special di Halloween for di dia 30 di october te 5 di november, cu mas detaye cual e lo comparti via su diferente medio di comunicacion.
