Despues di basta dia cu e problema a surgi den “sala D” di Corte, por bisa cu awo huesnan por trata caso bek, sin dificultad pa nan bista.
Dos siman atras 24ora.com a ilustra un situacion fastioso pa e huesnan. Mesora a cuminsa traha riba un solucion, pasobra di berdad cu e situacion tabata masha incomodo.
Pa practicamente tres siman, si no ta mas, hues mester a lesa tur documento sin luz grandi. Den forma di emergencia a pone desklamp pa tur esnan cu ta sinta na e mesa grandi den sala di Corte.
Segun por a compronde, den e sistema di coriente net riba e sala ey, a surgi un corto circuito den e kabel cu ta bay pa eynan. No ta compronde dicon el a dura asina hopi. Pero a informa cu finalmente, sala D di Corte, unda cu casonan penal ta tuma luga, ta bon ilumina pa e huesnan por traha sin problema di lesa e stapel di PV-nan cu ta haya nan mes cu ne durante casonan penal riba diaranson (tin biaha), diahuebs y diabierna. No solamente tin casonan di Prome Instancia pero tambe casonan di Hof ta atende eyden.
Riba e foto por mira un bista di e sala completamente ilumina.
