Ex-parlamentario y alabes ambtenaar na Directie Infrastructuur en Planning (DIP) no a cumpli cu procedura pa haci nevenactiviteit! Mientras cu nos pueblo ta pasa hamber y di baina tin cen pa cumpra un kipashi, ambtenaarnan privilegia di e grupo conoci como “Friends & Family” ta gosa di no un ni dos, sino tres salario! Ta resulta cu, mientras cu tur ambtenaar mester cumpli cabalmente cu regla y leynan laboral, cu tin otronan cu por pasa riba ley y cobra mas salario y tin entrada mas halto, sin tin permiso pa haci tal.
Durante e reunion publico di dia 1 di april 2022 pa trata presupuesto di enseñansa y deporte, parlamentario Miguel Mansur di Accion 21, a dirigi na Minister Endy Croes encarga cu Deporte: “Un pregunta cu minister a contesta den e verslag ta, cu segun mi minister su amigo, e ex-parlamentario di MEP y e actual presidente di Fundacion Lotto pa Deporte tin un salario di Afl. 3.000,= pa luna como voorzitter di dicho fundacion por encima di su salario como ambtenaar y kisas tambe ta haya salario como directiva di monumentenfonds y nos a compronde door di lesa den media cu e ta bou investigacion of ya computernan a wordo cohi na DIP y un di nan tabata di su persona.”
Parlamentario Miguel Mansur a sigui cu e sigiente pregunta/peticion dirigi na dicho minister: “Mi lo aprecia si minister por comparti e MB of e toestemming cu a dun’e e permiso pa haci nevenactiviteit?”
Minister Endy Croes su contesta riba esaki tabata: “Berdaderamente ta di añas caba cu e voorzitternan di bestuur di raad van bestuur ta cobra esey, normalmente ora bo ta un ambtenaar y e ta un “Ir” riba dje, e la bisa bo amigo, parlamentario etc. E ta un “Ir”, un bedrijfskunde dus ta bon opgeleid y normalmente bo tin cu pidi na DRH (Departamento di Recurso Humano di Gobierno di Aruba) den e caso aki si tin nevenfunctie of belangen verstrengeling cual el a haci pero berdaderamente e no a haya su MB ainda y nos ta den espera di esey.”
Ta trata di ex-parlamentario di MEP, Robert Marcelino Maduro, cu a bira masha popular tempo cu e tabata den politica pa motibo di a causa accidente y bandona e sitio mesora. Asina e nomber “hit and run” a bira popular den media. Dicho ambtenaar, campañado politico di MEP, ta cobrando cuater salario pa luna: top-salario di ambtenaar como coordinador di Team Toezicht Controle en Handhaving den Directie Infrastructuur en Planning (DIP), salario como presidente di Monumentenfonds https://www.monumentenfondsaruba.com/organogram/), como presidente di Lotto pa Deporte desde desde october 2021 (https://24ora.com/robert-maduro-a-bira-e-presidente-nobo-na-lotto-pa-deporte/) y como comisario den directiva di Utilities Aruba N.V. desde januari 2022. Parce cu na Utilities Aruba ta paga cada miembro den nan board, un salario mensual di Afl. 2.000,=.
E nombracion di e ex-parlamentario y alabes ambtenaar a sosode un paar di luna despues cu husticia a confisca su computer na DIP. (https://24ora.com/husticia-a-bolbe-drenta-dip-confisca-computer-y-documento/?utm_source=dlvr.it&utm_medium=facebook). Pues, a sabiendas cu e ta bou di investigacion penal pa posibel fraude den DIP, toch a opta pa dun’e un funcion asina crucial den Fundacion Lotto pa Deporte y despues den Utilities Aruba. No ta conoci con leu e investigacion aki ta.
Loading…
Reload document 
Open in new tab Den casonan asina, e ambtenaar mester haci un peticion oficial na DRH, a nan evalua y investiga si e funcion den banda aki lo por tin influencia of por ta den conflicto di interes cu e trabou regular den gobierno. DRH ta evalua por ehempel si e ambtenaar por saca probecho personal a base di e conocemento y informacion cu e tin a base di su funcion den gobierno.
Desde october 2019, director DIP, Rigoberto Haime Croes, a manda carta na tur empleado di DIP informando nan lo siguiente: “Den cuadro di e maneho di integridad cu gobierno ta hiba, incluyendo den e aparato gubernamental, unda cu tur empleado publico mester cumpli cu ley y reglanan stipula, DIP ta haci e siguiente peticion na tur su empleadonan. Segun Landsverordening materieel ambtenarenrecht (AB 1989 no. GT 37) mas specifico, articulo 55 e.v., tur empleado publico cu ta eherce nevenwerkzaamheden mester tin permiso pa haci tal. Den ningun circunstancia un empleado lo haya permiso pa haci nevenwerkzaamheden si esaki ta 1) dañino pa ehercemento di su funcion y 2) no ta conforme e prestigio di su posicion como ambtenaar y 3) bao di ningun circunstancia por tin conflicto di interes. A base di esaki ta pidi tur empleado cu ta haci eherce nevenwerkzaamheden pa informa esaki na directeur mediante un formulario di DRH. Dicho formulario lo wordo manda pa DRH pa asina haya e permiso necesario di e minister en cuestion. E carta ta menciona specificamente cu: Mester interpreta e palabra nevenwerkzaamheden ampliamente, dus por ehempel si ta eherce un funcion como miembro di un bestuur di un fundacion.”
A base di declaracion di Minister Endy Croes, dicho ex-parlamentario y alabes ambtenaar no tin un decreto ministerial pa haci e nevenactiviteit y tampoco e aprobacion y conseho a base di investigacion di DRH a wordo otorga, mientras dicho ambtenaar tin 6 luna eherciendo e funcion y cobrando pa esaki. Esaki ta contra e procedura legal y maneho di integridad!
No ta conoci si e tin e dicho decreto pa e funcion cu e ta eherciendo di presidente na Monumentenfonds. Ta cuestionabel si DRH lo duna conseho positivo mirando cu ambos funcion por tin conflicto di interes mirando e ex-parlamentario y ambtenaar su funcion den DIP ta uno delicado y e tin acceso riba tur informacion interno di DIP. E ambtenaar ta sigui haci su funcion mientras otro ambtenaarnan si no mag haci nevenactiviteit sin tin dicho decreto ministerial formalisa. Ta mustra cu e gobierno aki ta midi cu diferente liniaal y ta trapa riba procedura legal, maneho di integridad y principionan di bon gobernacion.
Tambe ta conoci cu den e mesun Directie Infrastructuur en Planning (DIP) tin otro empleadonan cu tambe a pidi pa por haci trabounan banda di esun di ambtenaar y a nenga nan! Es mas, nan a bay corte pa busca nan derecho y a perde tambe. Cu esaki ta mustra cu depende ken bo ta, bo ta haya permiso pa haci trabou ‘den banda’. Pero, den e caso specifico aki ta resulta cu e ambtenaar no a haya permiso mes, pero ta eherciendo y cobrando trankil. https://uitspraken.rechtspraak.nl/inziendocument?id=ECLI:NL:OGAACMB:2021:78
Ta momento pa Minister Ursell Arends di e ministerio di integridad cuminsa actua riba e iregularidadnan aki y mustra cu berdaderamente e no ta manera nan. No por ta asina cu un ambtenaar liga cu e partido, ni cu e ta un “Ir”, manera Minister Endy Croes ta purba hustifica, ta wordo privilega di tal manera desproporcial trapando riba procedura legal y maneho di integridad. Mientrastanto, minister-president, kende ta encarga cu DIP, a splica den un video (https://fb.watch/c8ng-lNTl8/) cu e ta aloca fondo adicional den su presupuesto 2022 pa atende cu trabounan atrasa den DIP. Logicamente e trabounan ta atrasa si no ta keda espacio y tempo pa ambtenaarnan den funcionan crucial por cumpli cu nan tareanan si nan tin tanto otro tareanan di nevenactiviteit pa cumpli cu nan. Ta urgi DRH y Bureau Integriteit investiga dicho iregularidadnan aki!
Mas cu claro tur cos ta keda den man di Minister di Integridad pa demostra si lo tuma pasonan legal of si ta haci denuncia na Landsrecherche tocante e susedido aki. Sinembargo, pueblo tambe mester lanta fo’i soño pasobra na final di cuenta, ta pueblo ta paga pa e consecuencia financiero y debe cu Aruba ta hinca aden.
