Robert Maduro a bira e presidente nobo na Lotto pa Deporte

Diamars ultimo Minister Endy Croes, encarga cu maneho di deporte di nos pais, a haci un bishita na directiva di Fundacion Lotto pa Deporte na Dakota . Desde siman pasa tabatin diferente intercambio di carta entre director di Lotto Roland Tuitt y minister y vice versa. Den e carta a avisa Roland Tuitt cu ningun momento ta intencion di gobierno pa prolonga e hunta di supervision actual di Lotto pa Deporte. Esaki despues cu e presidente saliente a manda informa gobierno cu nan termino a yega y cu nan ta baha hunto dia 18 di october.

Manera ta conoci desde 2009 bou di Gabinete Mike Eman 1, minister Mike de Meza a nombra su representantenan den e directiva di Lotto pa Deporte y awo, 11 aña despues, ainda e mesun personanan tabata na timon di Lotto pa Deporte.

Den cuadro di statuto nobo cu Lotto pa Deporte mes a cambia na 2017, a haci uzo di e articulonan di e statuto nobo; “unda e Minister lo mester nombra e miembronan cada 4 aña”. Cu articulo aki a manda un carta pa e director di Lotto, Roland Tuitt, pa avis’e cu e no tin ningun intencion pa prolonga e contracto di miembronan y conforme e statuto cu 18 di October 2021 ta nan ultimo dia di trabou.

Na mes momento a manda un carta pa cada un di e miembronan informando nan di su decision y a percura pa e carta wordo firma cu esaki a wordo ricibi. Gobierno a nombra cinco miembro nobo pa e Hunta di Supervision di Lotto pa Deporte.

Diamars atardi a presenta e cinco miembronan nobo na e director di Lotto, Roland Tuitt y a pidie tur cooperacion pa duna tur e informacionnan necesario pa e traspaso ta profesional pa e Hunta di Supervision nobo por funciona debidamente.

Miembronan nobo di e “Hunta di Supervision” di Lotto pa Deporte:

  • Robert Maduro – Presidente
  • Kenneth Bikker – Vice-presidente
  • Eric Mohamed – Miembro
  • Michael Lopez – Miembro
  • Michael Varis – Miembro

Conforme e statuto di Lotto pa Deporte, a nombra e presidente y vice-presidente. Den e prome reunion e cinco miembronan lo mester a nombra e tesorero y secretario.

Minister Emdy Croes tabata presidente di Fundacion Lotto pa Deporte pero despues a baha pa bira e director. Na aña 2009 ora a bin cambio di gobierno a realisa un investigacion cu a conduci na su detencion y despues retiro pa motibo di mal maneho. Despues di 12 aña e ta den posicion di Minister di Deporte y tin maneho di e fundacion. El a bay laga e fundacion cu mas of menos 35 miyon florin pa aña na entrada y a bin hay’e na un benta record di 50 miyon florin na 2017.