Daphne Lejuez: Di maart pa awo nunca a vota cu menos di 11 parlamentario

877

Daphne Lejuez: Ricardo Croes a pidi Presidente conta cabes y no por ignor’e. Den escandalo di mocion di desconfiansa; Constitucion ta riba un Reglamento di Ordo. Constitucion ta riba Reglamento di Ordo.

Parlamentario Indpendiente Daphne Lejuez, a duna su reaccion pa loke ta e reunion di ayera, caminda cu fraccion di MEP a entrega un mocion di desconfiansa contra minister Marisol Lopez-Tromp.

El a keda hopi sorpresa despues di mira con un reunion cu tabata supuestamente pa purba yuda e piscadonan y yega na un solucion pa spearfishing, a finalisa den un persecucion politico caminda cu kier a retira minister Lopez-Tromp.

Daphne Lejuez: Di maart pa awo nunca a vota cu menos di 11 parlamentario

Daphne Lejuez: Di maart pa awo nunca a vota cu menos di 11 parlamentario

Posted by 24ora on Friday, October 16, 2020

Esey no tabata e intencion na ningun momento ora cu a cuminsa e reunion. Lejuez indica cu esey no tabata e ocasion corecto pa haci’e y e motivacion, manera cu e minister mes a splica durante e reunion pa cual nan kier a dun’e e mocion, no tabata cuadra.

E motibonan no tabata cosnan na su alcance, sino di otro ministernan. P’esey Lejuez no ta compronde kico a pasa ayera.

Presidente di Parlamento a menciona cu e mocion tabata na su luga pasobra tur parlamentario a firma un acuerdo debi na e situacion di COVID-19.

Tin un staatsregeling. Lejuez a splica cu ora a haci palabracion pa motibo di COVID-19 den luna di maart, mester a trata e presupuesto 2020 e tempo ey.

A yega na e areglo hunto, cu mester mantene semper na staatsregeling. Pa por a cumpli cu e mandato di staatsregeling, e ora tur tin cu bay di acuerdo pa desvia di e reglement van orde, pa ta den sala, pero ta keda den e edificio.

Si ta den e edificio, e ora ey esey ta conta pa quorum. Pero e ta papiando di “beraads”, ta nifica cu ora cu ta den reunion. E votacion ta algo diferente. No por nunca vota cu 10 persona, hamas, segun Lejuez.

Den tur e lunanan aki for di maart te cu awo, ni cu a desvia, ni cu e acuerdo cu tin, nunca a vota cu menos di 11 persona.

P’esey no ta compronde e momento ora cu parlamentarionan di fraccionnan ta bisa cu ta bandona edificio, con e momento no ta reacciona y realisa cu no tin quorum.

E salida di Ricardo Croes

Ricardo Croes a anuncia cu e ta bandona edificio y a pidi presidente di Parlamento pa conta cabes, pero e no a haci esey.

Como presidente di Parlamento, segun Lejuez, na e momento ey e mester realisa cu ora un hende pidi pa conta cabes, e no por ignora e peticion ey. Na e momento ey, el a ignor’e y a sigui bay.

Lejuez ta opina cu mester a conta cabes, kisas e no a scucha Croes. E mester a realisa cu si e tin quorum na e momento ey. Esey ta basicamente cu Croes a indica na su persona.

Un ley superior

Cualkier studiante di ley di prome aña sa cu loke a tuma luga ayera, no ta corecto. Staatsregeling ta bisa cu e ta un ley superior. Kiermen nada ta para riba dje. P’esey Lejuez ta accentua, cu e acuerdo a cer’e ta pa desvia di reglement van orde, pero no staatsregeling.

E reglement van orde ta bisa cu mester tin un cierto cantidad di hende den e reunion. Awo por desvia di dje, pero no por desvia di staatsregeling. Pa desvia di staatsregeling mester a keda den e edificio, sea den fractiekamer of den oficinanan, por sigui e reunion audiovisual y ora di votacion tur mester bin un pa un aden pa duna votacion.

Esey ta nifica cu e quorum ta keda intacto den e edificio. Y pa via di COVID-19 ta purbando pa no ta mucho hende hunto den e edificio.

Na momento cu ta compronde cu nan ta bandonando e edificio, ta nifica cu nan no ta aanwezig. E Staatsregeling ta bisa bon cla cu no mag di tin reunion ni tuma decision, caminda e cantidad di miembronan den staten, ta mita plus un, cual ta 11, mester ta presente. E palabra aanwezig mester ta clave caminda cu mester ta presente. Aki esey ta hunga un rol. Na momento cu bisa cu no ta presente, bandonando no e reunion pero e edificio, e ora no tin quorum.

Siguiente fase

Segun Lejuez, e decision pa cuminsa si prome minister ta bay basa su mes riba e decision tuma ayera den staten, pa traha un landsbesluit pa despidi Marisol Lopez-Tromp y mand’e gobernador, e ora gobernador lo bay wak un rato su staatsregeling, entre otro y wak con e decision a yega pa conceptualisa.

Ta mira hopi scur cu e lo bay di acuerdo cu ne. Lejuez ta kere tambe cu ta keda na Marisol Lopez-Tromp pa bay busca su derechonan, pasobra lo ta bon pa papia cu gobernador y si mester entama un caso, den dado caso cu nan bay dun’e su retiro.

Mester corda cu e mocion ta un deseo di parlamento pa ehecuta. Ainda falta e parti di gobierno pa tuma accion riba e decision si e ta hay’e corecto. Si Lejuez, como parlamentario tabata den e reunion, e sigur lo a bandona e edificio.