Arubahuis: Informa bo mes bon y na tempo prome cu bay Hulanda

Tur aña Arubahuis ta informa riba e importancia pa futuro studiantenan cu kier bin studia na Hulanda pa tuma accion na tempo, pa regla e asunto di vivienda. E studiante cu tin pensa di bay studia na Hulanda mester tene cuenta cu mester inscribi pa camber sigur un of dos aña di antemano, dependiendo e ciudad.

Esaki ta e mensahe fuerte cu Minister Plenipotenciario Guillfred Besaril na e studiantenan. “Arubahuis ta keda enfatisa riba e importancia di regla vivienda na tempo mirando e scarsedad grandi cu tin den diferente ciudad. Mas tempran bo orienta y inscribi, mas grandi bo chensnan ta pa haya un luga di biba ora cu bo bin studia na Hulanda. Arubahuis hunto cu e mentornan tin e tarea pa duna e informacion y conseho necesario con por yega na vivienda. Nos ta enfatisa cu e studiante mes ta keda responsabel pa haya y regla su vivienda na Hulanda,” segun minister Besaril.

Kico ta e pasonan cu bo mester tuma:

1. Orienta riba e opcionnan di vivienda cu tin na e ciudad(nan) / via di scol(nan) unda bo lo kier bai studia;

2. Tuma bon nota di e procedura, reglanan y deadlines di cada opcion;

3. Tuma accion y inscribi na e instancianan cu ta ofrece vivienda pa studiante. Ta consehabel pa inscribi na mas cu un instancia;

4. Si bo no a scoge un ciudad ainda ta consehabel pa inscribi pa vivienda na mas cu un ciudad;

5. Keda monitor bo inscripcion. E studiante ta responsabel pa keda controla su inscripcion y reacciona riba vivienda unabes ta asina leu.

Kico ta e opcionnan di vivienda pa studiante na Hulanda?

1. Acomodacion pa studiante via di “Woningcorporatie”;

2. Acomodacion pa studiante via di scol (universidad of hogeschool);

3. Acomodacion via di “makelaar” of “bemiddelingsbureau’s”;

4.  Acomodacion via “particuliere aanbieder” riba plataformanan online;

5. Acomodacion via di famia, conoci of amistad.

Mas informacion specifico di cada opcion menciona y detayenan pa loke ta e bentaha- y desbentahanan di cada opcion por lesa bek riba e pagina special www.ea.aw/pages/studia-na-hulanda desaroya pa Departamento di Enseñansa conhuntamente cu Arubahuis.

Informacion di cada ciudad/regio

Den transcurso di e simannan cu ta bin, Arubahuis hunto cu mentornan lo publica informacion specifico di vivienda di cada region na Hulanda. Lo publica e informacion den medionan local y riba e pagina di Facebook OnderwijszakenArubahuis. Tambe por haya tur informacion bek riba e website di Departamento di Enseñansa di Aruba www.ea.aw, riba e pagina special Studia na Hulanda www.ea.aw/pages/studia-na-hulanda.

Expectativanan y importancia di vivienda

Ora di busca vivienda ta importante pa studiantenan balansa nan expectativanan y pa tin e “mind-set” corecto pa loke ta biba na Hulanda. Cuminsa simpel y chikito, pero tambe percura pa haal nan aña di estudio prome. “E aña siguiente ya bo conoce Hulanda mas miho y bo por orienta pa algo otro teniendo cuenta cu bo budget,” el a remarca. Mayoria studiante for di Aruba kier un studio cu tur facilidad pa nan mes, pero mester realisa cu e tipo di studionan aki ta schaars y mas caro compara cu un camber. Tene cuenta cu ora yega Hulanda, mester por inscribi na un adres mesora. Sin vivienda e studiante no por inscribi na Gemeente y no por haya su BSN-nummer. Pa ley e mester ta inscribi na yegada na Hulanda den e Basis Registratie Persoonsgegevens (BRP) door di a schrijf uit for di Aruba. Sin un adres na Hulanda y sin BSN-nummer tur resto di asunto cu nan tin di regla prome cu aña escolar cuminsa ta keda pega, por ehempel DUO, OV- studentenreisproduct, etc.

Minister Besaril di comienso di su funcion na Hulanda a mustra riba e importancia di un bon preparacion di studiantenan prome cu nan bin Hulanda. “Nos a scoge pa dos biaha pa aña tene encuentronan informativo pa e studiantenan na Aruba. Na luna di november e informacion ta concentra riba e alumno cu ainda mester scoge un estudio. Akinan nos kier enfatisa e tipo di estudionan cu ta brinda oportunidad di trabou na Aruba. Na luna di juni nos informacion ta dirigi specificamente riba e studiante cu ta cla pa bin Hulanda pa sigui studia. Banda di esey nos a logra extende e team di mentor di cuater na ocho pa asina garantisa un miho guia na e grupo di studiantenan den nan prome aña,” asina Minister Plenipotenciario Guillfred Besaril a bisa. Finalmente Minister Besaril y departamento di Enseñansa di Arubahuis ta desea tur futuro studiante hopi exito cu nan preparacion.