Registro mercado laboral ta na vigor bek den november

Bou di Departamento Progreso Laboral miho conoci como DPL ta resorta  tres departamento manera: Arbeidsbemiddeling en Re-integratie (Jobcenter), Arbeidsmarktregistratie (AMR) y tambe Advies Toelating Arbeidsmarkt (Admision).

E departamento di Arbeidsmarktregistratie (AMR) ta traha riba e demanda (lista di necesidad na personal) di dunadonan di trabou pa medio di e formulario di Arbeidsmarktregistratie.

Cu esaki DPL ta traha riba proyeccion entre demanda y suministro laboral pa e proximo aña, esaki ta sumamente importante pa asina DPL por traha di antemano conhuntamente cu scolnan, institutonan di educacion y dunadonan di trabou pa asina por produci y ofrece suficiente trahadonan local. 

Rekisitonan

DPL kier  haci un suplica na dunadonan di trabou pa yena e formulario nobo di Arbeidsmarktregistratie mas specifico y completo posibel mirando cu semper tin e posibilidad pa e dunado di trabou haci adaptacionnan na caminda riba su lista di necesidad na personal. Cu adaptacionnan ta referi na por ehempel esnan cu ta depende di proyectonan di trabou cu ta exigi mas personal of personal specifico, cu ta dificil pa anticipa. Semper tin e posibilidad pa haci cambionan riba e lista di necesidad entrega, pero si, na un forma realistico.

Pa locual ta trata e rekisitonan exigi pa entrega un Arbeidsmarktregistratie, tur esaki ta poni riba e prome pagina di e formulario estilo “checklist”. E dunado di trabao mester cumpli cu tur e puntonan corespondiente na su sector laboral pa asina entrega e formulario y haya aprobacion.

Formulario nobo

Pa por facilita e tempo di su clientenan y mirando e protocol di COVID-19, DPL a pone e formulario aki disponibel tambe riba su Website: www.dpl.aw caminda cu un y tur por subi y download e formulario di AMR cu ta cuadra cu su necesidad mirando cu tin cuatro diferente sorto di formulario di AMR. Nan ta reparti den sectornan laboral manera Horeca, General, Limpiesa-Hardineria-Siguridad y Construccion.

Pa por entrega e formulario di 2021 mester haci un cita online prome via email na: [email protected]. Na momento cu haya un cita y entrega e formulario via email y si resulta cu tur informacion ta cuadra ta ricibi un “bewijs van indiening” digitalmente, por dura 10 dia di trabou of un tiki mas (durante e periodo aki DPL por haci un control na e compania pa mas informacion) prome cu esaki keda cla y entrega bek aproba na e cliente.