E cantidad di casonan di COVID-19, coronavirus, a subi for di 2 caso anuncia dia 13 di maart ultimo, pa 71 caso anuncia dia 6 di april anochi. Esaki ta motibo cu cu Gobierno ta evaluando medidanan adicional pa bay tuma.
Gobierno a tuma diferente medida pa evita cu e contagio ta bay den forma rapido. A cuminsa cu medidanan chikito, enfatisando riba distanciamento social te cu a yega na lock-down, Toque de Queda, Shelter in Place y prohibicion di aglomeracion. “Aworaki nos ta evaluando pa bini cu medidanan mas severo cu ta evita cu tin mas hende riba caya.” Esaki pasobra tin un grupo cu ainda no ta compronde cu mester keda cas of no mester aglomera
Entre e peticionnan tin un toque de queda pa 24ora largo durante dos siman, manera Sint Maarten. E mandatario di su banda a bisa cu e kier tene na consideracion un toque de queda asina lo bay afecta e comunidad hopi mas. E ta kere cu via di e shelter in place mes lo por haci cierto adaptacionnan, manera por ehempel kita algun di e servicionan cu ainda ta wordo duna y pone nan den e categoria “no escencial” cu ta haci cu nan mester cera nan portanan.
Otro reto ta keda baymento di lama. A laga esaki pa motibo cu tin hopi hende mester di e tipo di e ehercicio aki pa nan salud, of pa relaha nan mes. Sinembargo esaki no ta nifica cu mester bay lama cu stul, jug y parasol pa pasa dia. Esey no ta ehercicio. E permiso pa bay lama ta encera ta drenta awa, landa, y despues sali y bay cas di biaha. Esey ta e motibo cu a cancela campamento tambe. “Ta permiti pa haci ehercicio pero no abusa di esaki.
Den e siguiente dianan lo anuncia e pasonan adicional cu ta bay tuma den esaki.
