En conexion cu e ultimo desaroyonan pa loke ta e pandemia, Crisis Team ta introduci algun cambio den maneho.
Pa motibo cu a registra un caso di e variante di India, a tuma e decision cu lo cera frontera cu India. Aunke ta un caso so a detecta, ta considera cu e paso aki ta uno necesario pa preveni mas caso.
FLEXIBILISACION
Mirando e progreso cu a logra te cu aworaki, Crisis Team, ta flexibilizando cautelosamente algun medida mas. Manera cu ya ta conoci caba den medionan social, pa loke ta sector di entretenimiento, na luga di un musico, awo por tin maximo tres musico of cantante riba escenario den cada luga. Sinembargo bailamento di publico no ta permiti.
Pa loke ta entiero, a tuma e decision pa aumenta e cantidad di persona cu por ta presente den un sala di entiero di 10 pa 50 persona.
BAY VACUNA
Crisis Team ta keda motiva tur esunnan cu ainda no a vacuna, pa nan pasa na e centronan di vacunacion na Centro Deportivo Libertador Betico Croes na Santa Cruz y na Teresita Center San Nicolas.
Mas hende sigui vacuna, mas e casonan lo sigui baha y mas medida por flexibiliza y den futuro elimina.
