Awe tabatin un veredicto den Corte relaciona cu un caso cu Island Finance Aruba a cuminsa contra un cliente cu no a sigui paga su debe. E cliente a bisa no por a sigui paga pasobra e interes cobra tabata demasiado halto. Despues di casi un aña Corte a yega na un decision. A prohibi e instituto financiero pa cobra interesnan asina halto cu ta pasa e norma den ley, esta di 18% pa aña!

Tin un concepto di ley traha, pidi door di Minister di Finanza na aña 2016, pero esaki no a wordo aproba ainda. E ta un ley cu ta protega consumidornan cu entidadnan financiero no por cobra interes di mas cu 1.5% pa luna of 18% pa aña.

A scucha expertonan di Banco Central di Aruba como testigo, kendenan a splica di e concepto di ley cu a yuda traha pero cu ainda no a wordo aproba. E ley aki ta brinda e proteccion necesario na e consumidor. Tambe BCA a bisa Corte cu nan ta kere cu mientras cu e ley aki no pasa Parlamento, ta tarea di Hues pa dicidi den casonan asina pa protega consumidornan di cobransanan cu nan ta considera “woekerrentes”, cual ta tur interes cu ta surpasa 18% pa aña.

Ya caba tabatin casonan similar cu a wordo trata den pasado pa e mesun problema di interes excesivo cu ta wordo cobra.

Corte a bisa cu ta normal cu mester cobra gasto extra ora cu un cliente no ta cumpli cu su pago, pero nunca e por ta loke cu e entidad financiero ta cobrando aworaki. E instituto a bisa cu e cliente tabata bon na altura di loke el a firma y kico e lo mester bay paga pa motibo cu e no tin garantia y ta wordo considera un caso di riesgo. Asina mes, Corte a bisa, mester protege e consumidornan desespera cu ta cay den situacionnan di prestamonan na interes demasiado halto.

E interesnan cu Banco Central a propone ta loke den su mayoria ta wordo uza na Aruba. Nan ta haya y Corte tambe, cu Island Finance por adapta su sistema y sigui sirbi e comunidad sin mester cobra interesnan halto cu ta brinda nan ganashinan exorbitante riba lomba di esunnan mas debil den comunidad.

E interes cu e ciudadano en cuestion a wordo cobra ta 9.25% mas di e norma local.

Corte a ordena IFA pa traha un schedule di e pago cu e cliente mester paga, kitando e pagonan haci, basa riba e interes normal di 1.5% pa luna y un maximo di 18% pa aña.

Comments

comments