Minister Besaril a felicita e comunidad Hindu cu 70 aña di independencia di India

239

Minister Plenipotenciario Guillfred Besaril a felicita e comunidad Hindu di Aruba cu celebracion di 70 aña di independencia di India durante di un recepcion na Piedra Plat Entertainment Center.

E recepcion a conta tambe cu presencia di Gobernador di Aruba Alfonso Boekhoudt, Prome Minister mr. Evelyn Wever-Croes y esposo, Minister di Finansas, Asuntonan Economico y Cultura mr. Xiomara Ruiz-Maduro, Minister di Husticia, Seguridad y Integracion mr.Andin Bikker, Minister di Enseñansa, Ciencia y Desaroyo Sostenibel dr. Armando Lampe y miembronan di parlamento Endy Croes, Sharleen Tromp-Lee y Ricardo Croes.

E programa official a keda inicia cu interpretacion di e himnonan nacional di Hulanda, Aruba y India. Despues presidente di The Indian Association of Aruba Henry Haresh Sadarangani a tene un discurso den cual ela cuminsa na bisa cu e comunidad Hindu tin casi 90 aña na Aruba. E ta un comunidad cu ta consisti di 500 persona, pero ta hopi activo den comercio na Aruba. Sr. Haresh Sadarangani a bisa cu e comunidad ta hopi agradecido na Aruba cu a brinda nan e oportunidad pa establece nan mes aki nan y cu Aruba a brinda nan e suguridad nesesario pa nan y nan famia. Tambe cu e comunidad Hindu a contribui na un manera positivo na desaroyo economico di Aruba. Segun Haresh Sadarangani e comunidad Hindu a sabi di integra nan un manera positivo den e comunidad Arubano, sin lubida nan herencia cultural.
Na final di e programa tabata tin dansanan tradicional di India.

Minister Plenipotenciario Guillfred Besaril a probecha di e ocasion pa a gradici presidente di The Indian Association of Aruba Henry Haresh Sadarangani y e consul honorario di India na Aruba Prakash Gupta pa e invitacion pa e recepcion special aki y a bisa di ta inmensamente agradicido pa e aporte di e comunidad Hindu na e desaroyo di Aruba.