E hobennan cu a participa na ‘Sociaal Vormings Traject (SVT)’ “Un Comienso Nobo” na Kazerne di Marina Suffisant, a ricibi nan baret. E grupo di hobennan aki, bou di guia di Defensa a cuminsa riba 22 di augustus 2022 cu e prome fase di e estudio.
Durante un periodo di cuater luna nan a siña den un forma militar norma y balornan manera disciplina, respet propio, structura, resistencia, confiansa y sentido di responsabilidad.
E grupo di 15 hoben riba diahuebs, 1 di december 2022, por a ricibi nan baret cu nan a merece hunto cu nan certificado durante un ceremonia cortico cu tur e partidonan envolvi. Presente tabata entre otro Minister President Gilmar Pisas, Minister di Hustisia Shalten Hato, Minister di Desaroyo Social, Labor y Bienestar Ruthmilda Larmonie-Cecilia, Minister di Enseñansa, Ciencia, Cultura y Deporte Sithree van Heydoorn como tambe e Comandante di Forsanan Naval den Region Caribe, General di Brigada di Marinier Frank Boots.
Siguiente Fase
E di dos grupo di hoben lo cuminsa mes ora cu e segundo fase, e trayecto di aprendisage (Leerwerktraject (LWT), bou di guia di e organisacion ehecutivo Funditut. Durante e fase aki e hobennan ta continua cu nan preparacion pa un funcion cu ta pas cu nan riba e mercado laboral, di acuerdo cu nan capacidadnan. Cu e dos fasenan aki Gobierno di Corsou hunto cu Defensa ta brinda perspectiva pa futuro na e hobennan aki.
Realisacion di e cooperacion
E proyecto aki ta keda realisa den e cuadro di palabracionnan entre Corsou i Hulanda, rond di reformanan den e ‘Landspakket’. E reforma aki ta inclui bou di e tema ‘H18’ y ta keda designa como Programa di Formacion Social/‘Sociaal Vormings Traject’. Ministerio di Husticia, Ministerio di Desaroyo Social, Labor y Bienestar, Ministerio di Enseñansa, Ciencia, Cultura y Deporte y Ministerio di Defensa, tur ta partner den e proyecto aki.
Na februari 2023 ta bay cuminsa un SVT nobo di damas. Bo kier meld bo mes of ta desea mas informacion? Manda un e-mail pa: [email protected] cu bo dato (number, fecha y luga di nacemento, copia di cedula, nomber di ultimo scol). Tambe por tuma contacto via WhatsApp na number: +5999 563-6626. Tur hoben cu inscribi mester pasa un ‘assessment’ cual ta tuma luga dia 12 y 13 di december 2022.
