Partido PAR a tuma nota di e veredikto di Korte di Hustisia di Kòrsou den e kaso di Fundashon Human Rights Caribbean kontra Gobiernu di Kòrsou.
Den e veredikto aki, Korte ta konkluí ku e artikulo(nan) den kodigo sivil ku ta determina ku matrimonio na Kòrsou ta solamente entre un hòmber i un muhe, ta kontra di e prinsipio di igualdat den nos areglo di estado, prinsipalmente pa motibu ku na Korsou no ta eksisti un alternativa legal pa parehanan di mesun sekso por regla nan derechinan sivil.
E veredikto ta aksentuá ku a yega e momentu pa nos komunidat diskutí na un forma konstruktivo riba e tema aki i Gobièrnu i Parlamento fiha un posishon ku lo benefisiá futuro generashonnan.
Grandesa di un komunidat, ta sintá den su abilidat pa atende na un forma sano, hustu i digno ku temanan manera esaki, na bienestar di tur su miembronan.
Komo un partido Sosial Kristian, PAR ta konsiente ku e tema aki ta unu delikado. Sinembargo, Posishon di partido di PAR riba e tema aki ya ta konosí. PAR ta kere ku un areglo di “geregistreerd partnerschap” òf tambe yamá “Union Sivil”, ta un opshon konkreto, ku ta regla e derechinan di parehanan di e mesun sekso na un forma efektivo i na mesun momentu ta respetá I protehá e balor Kristian religioso ku e instituto matrimonio tin den nos komunidat.
Partido i frakshon di PAR sigur lo drenta e dialogo aki den Parlamento i tambe den komunidat i lo enkurasha esaki tambe.
PAR ta urgi Gabinete Pisas pa informa komunidat di Korsou kon lo atende ku e sentensia aki mas pronto ku ta posibel.