Nos ta drentando e temporada di Semana Santa. Dianan pa refleha e pasion, morto y resureccion di nos Señor Hesus. Diadomingo di Rama ta duna inicio na e siman santo y e aña aki lo celebr’e na un manera sobrio. Mirando cu no por asisti na misa, Pastoor Andres Makowiec, Vicario Episcopal di Aruba, ta pidi fielnan catolico pa demostra Bo compromiso y solidarismo cu Hesus sufriente y nos pueblo sufriente door di pone un rama of cruz traha di rama riba porta di Bo cas. Despues pone e potret ey riba bo pagina di Facebook pa asina demostra bo comunion cu henter Iglesia. Ta promove e idea aki tambe na otro paisnan.
“Laga nos dorna nos porta di cas cu e rama mescos cu e Israelitanan a marca nan porta di cas cu e sanger di e lamchi pa nan liberacion for di sclabitud. Den e momentonan aki laga nos implora riba E misericordia di Dios y pid’E pa libera Aruba di efectonan cu e virus ta trece, pa medio di e sanger cu Hesus a drama pa nos”, asina e Vicario a duna di conoce.
Ban biba e siman aki uni cu Hesus den su pasion y morto, pa despues participa den Su victoria. “Mi ta desea un y tur un Siman Santo den comunion cu Hesus nos Salbador”, asina e Vicario a termina bisando.
