Tabata awe tardi pa 5:50 pm cu a bati alarma pa un candela den August Eagle Lifestyle Suites situa na Dr. J.E.M. Arends Boulevard # 19-A, cu ta keda net dilanti hospital. Ta riba e caminda cu ta conecta hospital pa The Movies @ Gloria. Danki Dios cu no ta e apartamento a pega na candela.
Testigonan a conta nos cu aki tabata trata di un corchon, den un warehouse unda tin e powerhouse. Eyden tin hasta airco, pues no ta compronde con e corchon a kima. Ta sospecha cu e tabata poni banda di un boiler cu ta suministra awa cayente. Lo por ta asina cu e boiler ta alcansa un temperatura asina halto, cu e resultado conoci.
Varios unidad di polis a yega mesora na e sitio pa atende cu publico y desvia trafico den e area. Un solo unidad di bombero a presenta, pero no tabatin necesidad di bay den accion. Mas bien nan a saca e corchon chikito di un persona afo y a verifica kico lo por ta motibo cu el a medio pega na candela. A duna e operador di e compleho di apartamento poco guia den con pa evita un caso asina.
