Polis a presenta den e caya entre Bongo Bar y American Bar na San Nicolas pa atende orario di ciere y un sospecho riba situacion contra regla. Ta pensa cu ta habri porta di patras pa laga cliente drenta, despues cu e bar cera.
E sucedido a tuma luga den ora di marduga (1:15 am) cu ta despues di ora di ciere. Na yegada polis a encontra un grupo di aproximadamente 15 persona para den dicho caya. Central di polis a haya yamada pa informa cu American Bar ta haci uzo di un porta parti patras di nan establecimento, pa laga hende drenta despues di orario di ciere.
Riba e informacion aki e patruya a presenta y cuminsa control riba ambos establecimento. A pidi e hendenan cu tabata ainda presente, pa bandona sitio mientras a dirigi nan mes na e dicho bar menciona.
Un persona encarga lo a indica na e polis cu e bar ta cera y cu no tin ningun hende mas den e localidad. Despues di controla ambos bar, e patruya a bandona sitio, pero no prome di avisa tur hende den parkinglot, cu nan tin cu cuminsa busca caminda pa cas.
