Cu masha fanfaria Gabinete Wever-Croes II forma pa MEP y RAIZ a anuncia cu a cera dump na Parkietenbos pa semper. Pa e bario tabata un momento historico, cu porfin nan lo por hala rosea trankil y sin teme anochi ora nan drumi cu lo por tin explosion of candela den bario. Pero e ceramento no a dura mucho pasobra ayera Gabinete Wever-Croes II a bay corte di apelacion den un caso di “voorlopige voorziening” pidiendo hues pa habri dump bek, uzando e hindervergunning bieu pa por kima bestia, resto medico y resto di slip procedente di Bubaliplas. Dia 8 di mei lo dicta un sentencia den e caso.
Na december ultimo hues a duna Anouk Balentina rason y a ordena Gobierno di Aruba pa emiti un Hindervergunning nobo pa por uza e incinerado. Despues di tur e lunanan, no a prepara niun permiso pero awo ta pidi hues, den un sorto di kortgeding, pa tuma un decision pa suspende e decision di Corte den Prome Instancia y permiti nan uza e hindervergunning bieu. Ironico ta cu den e hindervergunning ta prohibi pa kima bestia, pues ta un contradiccion.
E motibo cu no a logra keda cla cu un “hindervergunning” nobo, segun e hurista di DWJZ ta pasobra cu ta un asunto complica, cu ta rekeri “input” di varios departamento di gobierno y cu ta dificil pa haya tur riba e mesun liña. Pues, si compronde bon, un ciudadano ta bay corte y ta gana su caso. Hues ta ordena gobierno pa haci su huiswerk. Gobierno no ta hacie pero awo ta regresa corte y tira e bala bek den scochi di hues, invitando corte pa sinta den stoel di gobierno.
E hues staciona na Corsou a hasta haci un sugerencia, pa purba yuda gobierno pa haci nan trabou, pa e uza un fundacion na Hulanda cu ta conseha corte den casonan asina. E hurista di gobierno a bisa di lo bay puntra Minister Ursell Arends su opinion riba esaki. E hues ta haya cu esaki por ta un salida den e impasse cu tin awo.
