E pension di behes di Aruba (AOV) ta uno bon regla den ley y tur aña ta haci un evaluacion pa mira si ta necesario pa haci un aumento basta riba e inflacion cu tabatin den aña. Ir. Edwin Jacobs a splica esaki recientemente den entrevista den Enfoke.
Ley di AOV ta splica cu mester tuma e aumento di inflacion di por ehempel for di prome di september 2022 pa 31 di augustus, 2023. E cantidad cu cual e inflacion a subi, ta aumenta e pension automaticamente cu e porcentahe ey.
Esun di aña pasa tabata di 1.7% pero a duna un aumento di 4.2%. E porcentahe extra tabata pa compensa e remedinan cu AZV no ta cubri mas. E conseho tabata pa no pone e remedinan bek riba e lista, pasobra e remedinan tabata costa AZV 3.5 miyon y pa duna e pensionadonan e aumento ey tabata costa tres miyon florin.
E ariba menciona ta nifica e 360 adicional cu e pensionadonan ta haya, lo mester ta pa paga pa e remedinan cu antes AZV tabata cubri y despues a kita nan.
E situacion actual ta cu un pensionado soltero ta ricibi 1265 florin mas 170 florin di reparatietoeslag. Pareha casa ta ricibi 2130 florin, mas 70 florin (si un so ta haya pension) y ta bira 2300 florin.
Pa hopi aña caba ta hiba e maneho di trata di wanta e pension na 70% di e salario minimo. Y awo total e ta yega 73%.
