Sentimento di e consumidor a empeora den e di dos trimester di 2018, mandando e Indice Confiansa di Consumidor te 93,8 (igualando e cifra mas abou yega na di tres trimester di 2014), segun e ultimo resultadonan di e Encuesta di Confiansa di Consumidor (CCS) di Banco Central di Aruba.
Consumidornan tabata positivo riba nan situacion financianiero personal actual, cu un indice cu a subi te na 100,2. E otro componentenan di e situacion actual di e consumidor a permanece pesimista y consecuentemente tabatin solamente un subida chikito den e Indice di Situacion Actual for di 93,9 te na 94,3.
E Indice di Expectativanan a cai na 93,5, unda cu consumidornan a raporta un bista mas negativo riba tur e componentenan di e indice. Expectativanan laboral pa futuro a baha significantemente ya cu 67,8% di respondientenan a indica cu haña un trabou lo ta mas dificil den e siguiente 6 luna (42,8% den e trimester previo).
E Indice di Habito di Consumo a empeora den e trimester bou di revision (Grafiek 2). Consumidornan tabata solamente positivo pa bai cu vakantie, probablemente causa pa e prospecto di vakantie benidero. Mientrastanto, e gran mayoria di respondientenan (95,8%) ta anticipa cu prijsnan lo subi den e siguiente 6 luna resultando den un Indice di Expectativa di Prijs di 90,1 (0.1 punto lew di indice mas abou posibel).
Resumiendo, e empeoracion den e confiansa di consumidor ta atribui na caida den tur componente di confiansa di consumidor cu excepcion di e situacion actual di consumidor (Tabel 1).
