Soño cu Dios ta duna ta un soño limpi, sin envidia, orguyo of rencor, e soño cu Dios ta duna hende ta mantene hende humilde y obedecido na Dios, pa asina Dios su proposito ta cumpli den esun cu El a manda e soño p’e.
E soño cu Dios ta duna no ta contene inmoralidad, pero ta algo limpi, den cual Dios ta duna crecemento, y den cual Dios ta ricibi tur Gloria. Pero e gracia di Dios t’ey, pasobra Dios ta sostene bo.
E soño di Dios no ta kita nada for di ningun hende, e no ta destrui un famia, pa forma otro famia, pasobra Dios ta amor y E no por contradeci su mes. P’esey hende mester tene cuenta bon kico nan ta soña y haci oracion pidi Dios confirmacion di nan soño. Pasobra e diabel ta un mentiroso y e por presenta cu mentira den bo soño.
Hose (Genesis capitulo 37 te cu capitulo 50) tabatin tin diferente soño, e tabatin diesshete aña y su tata cu tabata stim’e hopi, a cumpra un tunica di hopi color p’e, cual ta nifica un tunica di autoridad. Hose su rumannan no a gusta esey.
Hose a soña cu su rumannan a buig p’e, y esey por poco a cost’e su bida. A tir’e den un pos seco y despues nan a sac’e, y bende cu e Ismaelitanan, asina el a resulta cerca Potifar.
El a traha den cas di Potifar y e gracia di Dios tabata riba su bida y e cas di Potifar tabata florece, pasobra Hose tabata eynan.
Potifar su casa kier a seduci Hose, pero Hose a huy pa inmoralidad, pasobra e tabatin respet y temor di Dios. Tambe e tabata respeta y agradecido na Potifar.
Inhustamente el a cay cera pa mas o menos diesdos aña, hasta den prizon el a ricibi gracia di Dios. El a bira hefe den prizon, pasobra Dios tabata cu ne. Cu 28 aña el a interpreta e soño di farao, y cu 30 aña e tabata nombra como gobernador di Egipto, pasobra el a interpreta farao su soño corectamente.
Wak bon tur locual el a pasa aden pa e proposito di Dios ta cumpli den su bida.
Un yamada ta bay pa tur hoben pa no descurasha, pasobra ora Dios tin algo pa bo ningun hende por kit’e for di bo.
No laga inmoralidad, droga, alcohol, mal amistad, politica, horta bo soño for di bo, haci bo best, studia y prepara.
Pa na e momento di Dios y den e tempo di Dios bo ta cla y dispuesto pa locual Dios tin pa bo.
Tur cos ta exigi tempo y sacrificio, no ta cu tur hende bo por comparti bo soño.
Tin hende ta matado di soño pa nan falta di fe y negativismo cu ta biba den nan curason.
Hopi biaha bo por topa cu hende cu kier horta bo soño y core bay bo dilanti y haci algo cu Dios no a manda nan haci. Nan lo no beneficia pasobra locual Dios a yama abo pa haci,Dios mes lo duna forsa pa cumpli cu ne.
Tin hopi hende cu ta bisa awendia cu nan ta sabi, pero nan sabiduria ta terenal, yena cu envidia, odio y arogancia, y nan ta ciega pa e enemigo. Pero e soño cu Dios a duna bo ta bini cu su sabiduria hunto cu ne, pa bo sa cu ta di Dios y lo hiba bo na e exito cu Dios kier duna bo.
