Aruba ta conoci pa ta un comunidad hopi conservativo, pero toch ultimo temponan por a mira mas aceptacion den e pueblo pa cu e comunidad aki. Asina Edision Andres Garcia, representante di Aruba Gay Guide a cuminsa na bisa. Esaki ta wordo refleha den mas evento, cu tin mas representacion den tur e eventonan cu tin riba e isla. Ta sinti cu ta riba e bon caminda pa yega na igualdad, cual ta loke nan ta busca pa tin na Aruba, derecho igual pa nan tur.
Compara cu antes, Garcia ta sinti cu pocopoco e tabu ta bira menos. Mas hende ta acepta cu nos tur ta ser humano y tur merece e mesun derechonan. Loke ta controversial ainda na Aruba ta e casamento entre dos persona di mesun sexo. Niun hende no por scoge pa otro cu ken nan kier pasa e resto di nan bida cu ne.
Garcia a splica cu e idea tras di Aruba Gay Guide ta pa crea eventonan unda ta crea un espacio pa e comunidad gay y no solamente pa nan, pero pa comunidad en general cu ta apoya e movemento aki. Esey, en principio tabata e idea tras di Aruba Gay Guide, pa crea espacio unda cu e comunidad por bin hunto pa conoce otro y bin cu ideanan, door cu no tin mucho evento pa nan.
Pocopoco por wak cu mas y mas hende ta bin n’e eventonan aki, cual nan ta sinti cu e aceptacion en general ta birando mas grandi.
