Recientemente Parlamentario Sue-Ann Ras di Fraccion di MEP, a entrega algun cambio pa loke ta trata e ley di Meldcode, Afdeling 3A Articulo 243a te 243d di buki 1 di Codigo Civil. E ampliacion- y cambionan aki ta basa riba un trabou cu a inicia for di februari 2018, unda cu Ras a sinta cu e instancianan clave, cu ta directamente envolvi cu e ley aki y cu e topico abuso di mucha y violencia domestico na Aruba. E ampliacion- y cambionan aki ta di sumo importancia pa combati y tambe preveni abuso di mucha y violencia domestico.
MELDCODE ABUSO DI MUCHA Y VIOLENCIA DOMESTICO
E ley ta cubri solamente abuso di mucha, pero mirando e realidad y relacion asina estrecho cu tin entre abuso di mucha y violencia domestico, Ras a sugeri pa pone e meldpunt pa e meldingnan di ambos; Meldpunt Kindermishandeling en Huiselijk Geweld. “No por descarta niun momento so, cu un mucha cu ta testigo di violencia domestico, por ta confronta cu tur tipo di abuso. Nan ta wak y scucha por ehempel violencia y conflicto entre e mayornan y ta haya nan confronta cu tur e consecuencianan, manera golpi di un of ambos mayor of nan mester huy bay un lugar sigur. Pues e mucha no ta solamente testigo di violencia dentro di un famia, pero tambe un victima y tin un calculacion di entre 30-60% di mucha cu no ta solamente testigo, pero tambe victima di violencia”, Ras a cuminsa na splica.
MAS MINISTER ENVOLVI
Mirando cu e topico abuso di mucha y violencia domestico no ta cay solamente bou di Minister di Husticia, a sugeri pa pone tambe Minister di Asuntonan Social como Minister di Salubridad Publico, pa hunto nan apunta un instancia cu lo fungi como meldpunt pa abuso di mucha y violencia domestico. Segun Ras; “Un trabou den colaboracion, structura y bon delinea ta di sumo importancia, ya cu cada un di e ministerionan aki tin e instancianan clave, cu ta directamente relaciona cu e topiconan di abuso di mucha y violencia domestico, unabes cu apunta e meldpunt general aki”.
IMPLEMENTACION DI ARTICULO 243f
Pa sigura cu e meldcode ta funcionando optimalmente den nos comunidad, ta importante pa haci evaluacion structura continuo. “Mi ta aplica e expresion di “meten is weten”, cu ta importante pa tin den cualkier situacion, specialmente si kier combati y preveni”, Ras a indica. Den articulo 243f tin un ‘evaluatiebepaling’ of sistema di evaluacion, unda cu e minister encarga cu husticia, tur aña mester entrega un relato na Parlamento tocante e ehecucion di e ‘afdeling’ 3A di capitulo 13 di buki 1 di Codigo Civil. Na mesun momento Ras a entrega tambe algun punto di sugerencia di 5 punto, cu e instancianan por uza, pa haci e evaluacion di control mas efectivo y eficiente. E 5 puntonan aki ta loke Ras a conclui durante e reunionnan cu e instancianan concerni y UNICEF ta mas cu dispuesto pa duna su aporte pa garantisa efectividad. “No ta importante pa Parlamento sa nomber ni informacion personal di cada caso, sino pa haya un investigacion statistico tocante e efectividad y di e sistema huridico. Door di e eherce e supervision via un ‘evaluatiebepaling’, e miembronan di Parlamento por, si ta necesario, propone e cambionan di ley corecto, pa promove e efectividad di e ley di Meldpunt & Meldcode Kindermishandeling” asina Sue-Ann Ras a finalisa bisando.
