Tabata tin un encuentro pa gradicimento na Colegio Bon Bini. E cabesante di e scol, Sherissa Tsu, a splica cu nan a haci un peticion na minister di infrastructura pa traha un Gazebo. A dun’e un tekening. E minister a bin un dia y a bisa cu no lo traha riba dje, pero lo traha riba algo mas miho di loke a pidi. A pidi algun plywood y algun biga. E ora e minister a splica cu e lo haci esaki pa Colegio Bon Bini.
Pa e scol, nan no a spera algo asina bunita y grandi, pero awor aki si mira bek, e ta un soño cu a bira realidad. Si ripara bon, nan no tin luganan fresco. E muchanan ta constant den solo. Mainta tempran awo nan por sinta un rato, den pauze nan por sinta y por trece un tiki mas fresco pa e muchanan ora di hunga pafo.
Trabaonan voluntario
Esaki ta un trabao voluntario. Esaki a sosode den temporada di Aruba Doet. Nan a cuminsa hunto cu su infrateam durante Aruba Doet. Esey a sigui durante e diadomingo, e dialuna despues di trabao nan tabata bin. El a dura un tiki, pero despues di trabao y den fin di siman nan tabata bin for di 7’or di mainta y tabata bay cas casi 8’or pa 9’or di anochi, pa nan a keda cla.
Awe e scol a gradici e minister pa e gesto aki. E ta algo inesplicabel. Por mira cu Aruba tin hopi hende humilde cu no ta wak ki posicion tin, pero djis e bienestar di e muchanan y tambe yuda otro.
Otro bon noticia
E scol tambe tin un otro necesidad. Esey ta e parti di asfalt. Si pasa rond, por mira cu e asfalt ta hopi kibra. Cada biaha cu e muchanan cay, nan ta corta nan pia y ta keda marca pa resto di nan bida. Semper tabata kier asfalt nobo. Esey tambe ta un otro soño cu lo bira realidad.
Muchanan cu gradicimento
Hunto cu un docente di e scol, un cantica a wordo traha y atrabes di e cancion ta gradici e minister, como tambe Infrateam y otronan cu a sa di traha hunto cun’e.
