Recientemente, Colegio Arubano a organisa un ‘open dag’ pa e alumnonan di klas 6 di scol basico, e alumnonan cu ta finalisando MAVO, e alumnonan cu ya ta na scol y kier sa mas tocante profiel y estudio tanto na Aruba, como den exterior, mayornan y otro hende interesa den conoce e scol miho.
E ‘open dag’ tabata bon bishita. A presenta tur materia na e alumnonan (di futuro) y nan mayornan. Tambe tur e clubnan di servicio na comunidad, e conseho di alumno di Colegio Arubano y ‘boekenfonds’ a duna splicacion. E invitadonan por a sigui lesnan di prueba y traha tarea di diferente materia den diferente lokaal.
Hopi invitado a duna di conoce di a disfruta di e dia y mayornan a duna ‘feedback’ positivo y tabata bou impresion di e scol.
Colegio Arubano ta organisa banda di les diferente actividadnan pafo di scol, manera actividadnan boluntario na beneficio di nos comunidad. Tin excursion na Aruba y den stranhero. Esakinan ta inclui e proyectonan di Erasmus+, y aki poco un grupo di VWO5 lo biaha pa Hulanda y un grupo di HAVO4 pa Colombia.
Actualmente e scolnan basico por inscribi nan alumnonan di klas 6. Despues di realisa e ‘doorstroomtoets’, tur alumno, cu ta cumpli cu e rekisitonan, ta haya un carta cu informacion tocante e procedura di inscripcion. Te ora a tuma e decision final di inscribi e alumno na Colegio Arubano, e pago ta tuma luga. No tin un cantidad maximo di alumno cu scol por admiti. Tur alumno cu cumpli cu e rekisitonan di admision ta bonbini.
Colegio Arubano ta e scol secundario di nivel HAVO/VWO mas grandi na Aruba, cu casi 1300 alumno. E scol ta un scol catolico, habri pa tur otro denominacion y cu e aña aki ta celebra su 65 aniversario. E scol aki a forma hopi profesional na Aruba. Nos ta conta cu un aña escolar nobo exitoso.
Pa mas informacion por tuma contacto cu Tim Croes, rector di Colegio Arubano, na [email protected].
