Clubnan di atletismo bogando pa cambio di directiva

499

Clubnan di atletismo kier un directiva nobo na Arubaanse Atletiek Bond (AAB). Despues cu a surgi un malcontento den e directiva actual di federacion di atletismo (AAB), clubnan di atletismo mes a tuma e iniciativa di bini hunto y discuti riba e problemtatica actual. Despues di varios luna ainda no a yega na un solucion mientras e clubnan miembro di dicho federacion no kier a keda mas cu man crusa y a yama un reunion pa dicidi riba futuro di e deporte cu nan ta practica.

Asina tambe e clubnan miembro di e federacion di atletismo(AAB) kier vota unanimamente pa un cambio pa loke ta trata e futuro di nan deporte. Bou di e federacion di atletismo na Aruba ta resorta track and field, road running y race walking. Tur kier mira un cambio permanente.

Parce cu Arubaanse Atletiek Bond no a yama ni tene un reunion general pa mas di 1 aña caba. Esaki ta contra statuut cu ta rekeri 2 reunion general pa aña. Awor ta mustra cu e clubnan mes a pidi pa un reunion extra-ordinario den e dianan benidero.

Kico realmente ta e problema no ta conoci, pero lo por tin di haber cu e relato financiero.