Den e ultimo dianan por a tuma nota cu e biento ta varia bastante, esaki ta keda cambia di direccion y di un momento pa otro e biento ta bin ‘inlandig’. Esaki ta presenta un otro problema pa e ciudadanonan di Parkietenbos, cu e cambio di direccion di biento, e huma cu ta sali for di e landfill debi na kimamento di sushi, ta bay strit riba e casnan.
Esaki ta pone cu henter e bario ta keda bou di huma. Anouk Balentina, un ciudadano preocupa cu ta biba den vecindario di Parkietenbos a splica cu esaki ta un caso hopi fastioso, specialmente pa e periodo di vakantie cu a caba di pasa ya cu e muchanan no por a sali pafo pa hunga debi na e cantidad di huma presente.
“Ta constantemente nos ta bou di huma” tabata e palabranan di Balentina, kende ya a entama un caso contra e situacion aki, esta e kimamento di sushi den aire liber como tambe e problema di e incinerator.
Actualmente nan tin e incinerator ta traha hasta den oranan laat di anochi, pasa di 12:00 am, band’i dje tin candela ta kima y e awo tur e “porkeria” di RWZI ta bin den parkietenbos y esaki a bira un extra molester pa e ciudadanonan.
Tur esaki ta causa un situacion bastante desagradabel pa loke ta trata salud, manera problema cu halamento di rosea, nanishi tapa, dolor di pecho, kimamento di wowo y mucho mas y awo cu temporada di COVID dicho simptoma ta trece un susto cada biaha pa e ciudadanonan. Balentina mes a conta cu el a test un total di seis biaha pa Coronavirus.
Pa cobertura mas amplio lesa edicion di TREMPAN mañan.
