E siman aki ainda gerencia di CITCO Aruba Refining Company (CAR), a informa e compania “PROJECT MANAGEMENT AND ENGINEERING CONSULTANCY” (PMEC) cu ta kibra e “Service Contract” cu nan di forma abrupto entrante diadomingo awor dia 30 di september 2018. E decision aki a cay di sorpresa cerca e compania, cu pa añanan largo ta sirbiendo e refineria, bou diferente compania cu a opera e refineria na San Nicolas. Nan ta considera di tin un bon relacion cu CITGO. Cu e decision aki, awor ta haya nan ta laga mayoria trahado bay cas mesora.
Den un carta manda na tur trahado di PMEC, a informa nan di e decision di CITGO y na mes momento splica di nan decision tambe pa termina e relacion di trabou cu tur trahado e fin di luna aki mes. PMEC a lamenta e decision unilateral aki, cu ta hole na persecucion politico.
Ta for di algun siman pasa caba, Ministernan a insinua cu ta un solo compania ta hayando mayoria trabou den e refineria. Aunke esey no ta cuadra cu berdad, el a hinca e refineria den un situacion dificil. Esta, si kier ta bon cu Gobierno y haya e permisonan necesario lihe, cu no por traha mas cu companianan cu no ta considera “amigo” di e Gobierno actual.
Trahadonan a informa gerencia di PMEC, cu diripiente otro compania, masha cerca di Gobernantenan actual, a acerca tur cu oferta di trabou. E informa nan cu e compania ki si lo haya contract cu CITGO y cu si nan acepta e oferta, cu nan lo por sigui cu nan trabou normalmente, pero cu e compania nobo.
A funda PMEC na Juli 2000 y desde e tempo ey ta un di e unico “Engineering Firm” nan di Aruba cu ta ofrece tur tipo di servicio na CITGO, WEB, Elmar y otro companianan grandi. Nan oficina ta situa na Amsterdamstraat na San Nicolas y ta maneha pa Jairo Wever.
Nos no a logra haya contacto cu Jairo Wever mes, pero nos a comprende cu e intencion awor ta pa entama un caso sumario contra CITGO Aruba y contra Minister Glenbert Croes. E compania ta acusa e mandatario di ta mete directamente den maneho di e refineria, den ken ta haya trabou y kende ta riba e lista di “vendornan” prohibi.
Di otro banda, CITGO Aruba tin un debe halto cu PMEC, cu ta data for di hopi tempo caba. E decision unilateral aki pa termina relacion den forma abrupto ta pone cu nan mester cumpli cu tur pago den e siman aki tambe. De lo contrario por spera ponemento di beslag y tur otro forma di ehecuta presion pa por cobra debenan atrasa di e refineria na e contratista netamente Arubiano.
