Aki tres siman lo mira te con leu Ministerio Publico a logra convence Hues pa condena e grupo envolvi den investigacion di caso yama “Sea Land”, envolvi den traficacion di droga pa Hulanda y Inglatera. Mas ainda pasobra aki na Aruba mes no a confisca droga.
Esnan envolvi den e caso aki ta Hernando Rafael Mercado Ochoa, Kevin Christopher Richardson, Rosalinda Mercado Ochoa Rasmijn, Camilo Escobar Vidal y Alfredo Alberto Velazco Alviarez.
E cantidad di acusadonan envolvi a haci cu a tuma henter un dia pa su tratamento. Den oranan di mainta tabatin e parti unda a repasa e PV, Hues a haci pregunta y Fiscal a presenta su rekisitorio. Den oranan di merdia defensa a hiba palabra y e acusadonan tabatin chens na ultimo palabra.
Tur e detencion aki a logra haci, basa riba un investigacion grandi cu a tuma luga na Hulanda despues cu a gara un mula na Inglatera, biahando for di Aruba, cu casi 12 kilo di cocaina. A base di investigacion cu a sigui, nomber di e homber Mercado Ochoa a cay, asina a haya permiso pa investigue, inclusive a pone microfon den su auto.
Mercado Ochoa no ta desconoci pa husticia, ya cu na dos ocasion caba el a haya condena pa violacion di ley di droga. Den e caso aki, tur ta nenga di ta envolvi, aunke cu e principal sospechoso ta admiti si cu cierto personanan a aserk’e pa motibo di su rol cu el a yega di hunga den pasado den traficacion di droga, pero e no a acepta e oferta. E Polisnan ta papia di hopi cos, el a bisa, “pero demostrami cu ta mi bos boso tin graba y e transcripcionnan mi kier wak nan pasobra mi no sa si loke nan a pone eyden ta berdaderamente loke cu mi a bisa.”
Ya caba den e caso den cual Mercado Ochoa tabata envolvi den pasado den dje, Corte a baha e castigo ora cu a haci uzo di microfon den forma ilegal. Y e biaha’ki un biaha mas a haci uzo di e aparato aki, pero Fiscal a bisa cu nan a busca e autorisacionnan necesario pa esaki.
E acusacion contra tur e acusadonan aki tabata participacion na un organisacion criminal cu a trafica den droga, mientras cu den e caso di Mercado Ochoa tambe posesion di arma di candela.
Tin un combersacion graba tambe di e señora Mercado Ochoa, kende tabata papia den forma sospechoso, pero e ta bisa cu no tabata trata di trafico di droga pero contrabanda di whiskey.
Alfredo Alberto Velazco Alviarez, kende ta bishita Aruba regularmente, dilanti mesa berde a admiti cu e tabatin un combersacion cu Mercado Ochoa. Pero el a actua como intermediario entre un homber Chines, kende tabata busca 10 kilo di cocaina, y Mercado Ochoa. El a haci esaki door cu e tabata na altura cu Mercado Ochoa tabata conoci den pasado den mundo di droga. Pero e acusado ey a bis’e cu e no tin nada y e Chines a bay for di Aruba, pa cual e deal no a sigui.
Durante e investigacion tambe a bini dilanti con a transporta droga un biaha, ademas di esun pa Inglatera, pa Hulanda den cual nomber di Mercado Ochoa y Richardson a cay. E tipo di bleki di comestibel uza a wordo haya na cas di Mercado Ochoa tambe.
Pa Fiscal e combersacionnan graba ta suficiente prueba cu tur e acusadonan aki tabata envolvi den e dos transportenan di aña pasa cu a conduci na e detencionnan na inicio di e aña’ki. Banda di esaki, Mercado Ochoa tabata na Inglatera y a haya number den su celular cu tabatin den celular di un di e detenidonan na Inglatera tambe. Y tur cos ta indica, segun e fiscal, cu e cabes di e transportenan aki tabata e homber Mercado Ochoa, p’esey e demanda di mas halto tabata contra dje, esta 5 aña incondicional.
Pa Escobar Vidal y Velazco Alviarez, a demanda castigo di prizon igual na loke nan a sinta caba, y 5 luna condicional mas 3 aña di prueba. Pa e señora Mercado Ochoa, a pidi 18 luna di cual 6 luna ta condicional cu 3 aña di prueba.
E homber Richardson, kende tabatin un rol mas grandi cu e otronan, Fiscal a pidi 2 aña di cual 8 luna ta condicional y tres aña di prueba.
Aki tres siman tin sentencia den e caso aki.
