Oficina Central di Estadistica (CBS) Corsou a tene Encuesta di Forsa Laboral (AKO) na Corsou entre october 2022 pa februari 2023. Durante di Encuesta Forsa Laboral di 2022 a agrega 3 pregunta tocante e siguiente topiconan: Medionan Social, cohesion Social y Pobresa.
Awe CBS ta presenta algun resultado di Uzo di plataforma di medio social na Corsou pa aña 2022:
E cinco plataformanan di medionan social mas uza na Corsou na 2022, tabata WhatsApp (80,5%), YouTube (71,6%), Facebook (62,1%), Messenger (49,2%) y Instagram (37,8%). En general, uzo di tur plataforma di medio social a subi bou di e poblacion di 5 aña p’ariba.
Uzo di medio social pa cada sexo
En general, no tin masha diferencia den uzo di e plataformanan di medio social a base di sexo. Ta pa e plataforma Pinterest so tin un diferencia grandi entre e cantidad di hende muhe y hende homber di e poblacion cu ta uz’e. Mas tanto hende muhe (26,7%) ta uza Pinterest compara cu hende homber (11,6%).
Aki ta sigui un descripcion mas detaya di e cinco plataformanan di medio social mas uza na Corsou
WhatsApp ta e plataforma di medio social mas uza na Corsou. Uzo di WhatsApp a subi di 67,0% na 2017 te 80,5% na 2022. Uzo di e plataforma aki ta casi igual bou di tur grupo di edad.
YouTube ta e di dos plataforma mas uza. Su uzo a subi mas cu di e otro plataformanan, un aumento di 20,4% entre 2017 y 2022. Na tur, 71,6% di esunnan encuesta a bisa cu nan ta uza e plataforma aki, compara cu 51,5% na 2017. E gruponan di edad for di 06-14 aña te cu esun di 35-44 aña ta uza e plataforma aki un poco mas cu e gruponan di edad mas halto.
Den e ultimo 6 añanan, uzo di Facebook a stabilisa un poco, aunke ainda e ta un di e medionan social mas uza bou di adulto na Corsou: 44.3% na 2023, compara cu 55,5% na 2017. Algo remarcabel ta e aumento bou di e grupo di edad di 55-64 aña, di 25,6% na 2017 pa 68,5% na 2022.
Messenger a crece cu 1,8% entre e dos momentonan cu a midi su uzo; di 47,4% na 2017 pa 49,2% na 2022. E gruponan di edad di 15-24, 25-34 y 35-44 aña ta esunnan cu mas tanto ta uza e plataforma aki.
Tin un aumento leve den uzo di e plataforma Instagram, di 21,5% na 2017 pa 37,8% na 2022. E gruponan di edad cu ta uza Instagram ta di 15-24 (82,0%) y di 25-34 aña (72,3%).
Plataformanan di medio social impopular na Corsou, na 2022
E dos plataformanan di medio social menos popular na Corsou ta Twitter y LinkedIn. Na 2017 tambe nan tabata e dos plataformanan menos uza. Pero uzo di tur dos plataforma a aumenta: tog si,Twitter, di 8,5% na 2017 pa 11,2% na 2022 y LinkedIn di 6,0% (2017) pa 10,8% na 2022. Pa tur dos plataforma, e gruponan di edad cu mas a uza nan ta esun di 15-24 aña y esun di 25-34 aña.
Mas informacion
Por haya un bista di uzo di tur plataforma di medio social a base di sexo i edad den e tabelnan na https://www.cbs.cw/usage-of-social-media-platforms-in-curacao.
