E dicho di burico ta dal su pata dos biaha por ta aplicabel den e caso aki, mirando cu no ta ni un, ni dos, sino tres biaha e mesun auto a reverse y a dal su auto contra e esun tras di dje.
Tabata diaranson marduga ora cu a drenta informacion di un triple hit and run cu a tuma luga na Montaña. Polis na nan yegada a bin compronde cu un Toyota Camry color shinishi, A-60363, lo a reverse no un, ni dos pero tres biaha riba e mesun auto y di e mesun forma.
Aparentemente un set di amigo cu tabata cu 3 auto despues di a trip y a bay para banda di caminda cerca di e crusada di Montaña pa bay Sero Janchi.
E Toyota Camry tabata para mey mey y a bay reverse pa sali, pero sin paga bon tino. Apesar cu e chauffeur di e Nissan Silvia a dim bright y a pita, asina mes e chauffeur di e Camry a dal e y sali core bay direccion p’ariba. Chauffeur di e Nissan a bay su tras pasobra su auto a haya daño. Na Kudawecha e Camry a para y e Silvia un biaha mas a bay para su tras pero na un distancia e biaha aki pero asina mes e Camry a reverse y a bolbe dal riba e Silvia y a sigui core bay.
Na yegada di e Camry na Montaña, e chauffeur di e Silvia a bay para tras di e Camry y como cu no tabata tin forma pa e Camry a sali e chauffeur di e Camry a bolbe reverse dal e Nissan Silvia. Afortunadamente ningun hende a resulta herida. Polis a nota cu e chauffeur di e Toyota Camry tabata bao influencia y a detene.
