Diadomingo a celebra 40 aña cu e prome pashent di Aruba a ricibi tratamento di hemodialyse na Dr. Horacio E. Oduber Hospital. A cuminsa na 1981 cu un (1) mashin y e practica aki a desaroya cu awendia tin henter un centro di dialisis na HOH. Diadomingo den un esfera sumamente alegre a habri oficialmente un exposicion den compania di diferente profesional cu a forma parti di e comienso di hemodialyse na HOH y Aruba.
Jacco Vroegop, director di Hospital, a duna di conoce cu semanalmente ta atende mas o menos 100 pashent na e centro di dialisis. Esunnan cu ta dialisa ta consciente di e importancia di e cuido di hemodialisis pasobra sin esey nan lo no sobrevivi. Ta importante pa semper mantene e centro di Dialisis na HOH den bon condicion y keda inverti den e aparatonan mirando cu pashentnan ta depende di esaki pa sobrevivi.
Pa e añanan nos dilanti ta importante pa sigui inverti den prevencion mirando cu e cantidad di pashent ta sigui aumenta anualmente. Dialisis hopi biaha por wordo preveni door di hiba un bida saludabel y haci deporte.
Rica Delamarre ta un di e prome nursenan di hemodialyse na HOH cu a cuminsa 40 aña pasa ta brinda e tratamento aki. Rica a duna di conoce cu el a sinti orguyoso na momento cu a scog’e pa bay curso di dialisis 40 aña pasa. E tempo ey nan tabata tres nurse di ciudo intensivo. Dr. Oswald Wever, internista a bin bek di Hulanda despues di su estudio y a cuminsa cu algo otro pa hende cu ta sufri di riñon. A purba haci tur loke por pa pashent ora di dialisis kendenan tabata bay den cuido intensivo. Dr. Wever a duna nan curso y e grupo cu kier a sigui profundisa a bay Corsou pa loke ta e parti di teoria. Rica ta contento y orguyoso, pasobra esey a significa cu nos ta avansando den cuido medico. Y asina a cuminsa cu hemodialyse na HOH Aruba.
Nefrologo Dr. Kock a splica cu semanalmente nan ta dialisa como 100 pashent. Na momento cu el a cuminsa na HOH, nan tabata atende 30 pashent. Pero e cantidad a sigui crece. Edad di pashent ta varia, pero e promedio di pashent di Centro di Dialisis ta 55 aña. E pashent di mas hoben cu tin, ta un mucha homber entre 13 y 14 aña di edad.
Dr. Joel Rajnherc, director di ImSan, a felicita Dr. Horacio E. Oduber pa su 40 aña di hemodialyse. El a duna di conoce cu un di pioneronan di dialyse tabata dr. Oswald Wever y a gradici’e pa tur cos cu el a haci pa Aruba. Si no ta p’e y grupo di pioneronan aki, awe nos lo no ta para unda nos ta awo. Semper ta importante pa recorda unda a cuminsa pa asina aprecia e desaroyo den cuido medico na Aruba y den e caso aki e tratamento di hemodialyse na HOH. Danki ta bay na tur cu a forma parti di e grupo cu a cuminsa cu e cuido aki na Aruba. Boso tabata esencial den e desaroyo aki!
