Diamars durante un Conferencia di Prensa na Peanuts Restaurant, Fundacion Bernadina Growell-Kock a anuncia su proximo festival di canto dedica na Nos Mama di Cultura Bernadina Growell-Kock. E festival lo tuma luga dia 22 di juli venidero di 8:00pm pa 1:00am den Centro di Bario Brazil.
Presidente di e fundacion, Mervin Wyatt- Ras a invita un y tur pa bin presencia e gran festival aki. El a relata cu a inicia cu e festivalnan na aña 2011. Presente n’e conferencia di prensa, Na e conferencia di prensa a asisti tambe 2 ganado di e festivalnan pa comparti nan experiencia. Nan ta Betty Werleman (ganado di e prome festival na 2011) y Antonieta Ras-Booi (ganado di e ultimo festival di 2019).
Wyatt-Ras ta menciona cu e ganadonan sigur a haci un bon papel. El a trece dilanti cu fundacion ta hopi agradecido na tur esunnan cu semper a duna sosten. Aunke no por depende mucho di ayudo financiero, toch a haya bon sosten di Departamento di Cultura. Entre otro tambe di sr. John Freddy Montoya, kende semper ta yuda nos. Tambe ta ricibi cooperacion di Centro di Bario Brazil. Alabes a yega di wordo yuda dor di Banco di Caribe y RBC. Pero esunnan cu ta aporte mas na e festival ta comunidad cu ta acudi grandemente. El a elabora encuanto e metanan. Entre otro conserva tur loke mama di Cultura a laga tras, reconocimento y valor na loke mama di Cultura a haci pa Aruba, conscientisa nos comunidad encuanto su logronan, conserva y fortifica nos cultura.
Trabounan cu fundacion a haci te awor ta drecha cas di Bernadina cu locual atrobe nos ta bezig. A coloca un relieve na Paseo Herencia acompaña pa un Parada Cultural, a duna un caya nomber di nos Mama di Cultura, ta participa tur aña na paradanan cultural. Anualmente ta organisa un festival cu excepcion di un par di aña. Ademas a publica un buki conmemorativo di Mama di Cultura. Segun presidente di e fundacion ta premira cu e biaha aki tambe e festival lo ricibi e acogida necesario y fundacion ta sumamente agradecido na tur miembro di e fundacion y boluntarionan cu ta duna nan e sosten tur biaha, entre otro Persey Jeand’or, vice-presidente, Magdalena Orman-Yarzagaray, secretaria, Jo Orman, como tambe John Freddy Montoya y Roland Jansen. Tambe e fundacion a haya algun miembro nobo cu a join e fundacion pa yuda nan pa haci e festival aki bira realidad. E presidente a gradici un y tur di curason.
Secretaria Magdalena Orman-Yarzagaray a duna mas detaye encuanto e participantenan y di otro rekisitonan pa cu e festival aki. Ganadonan di festival di 2011 tabata Betty Werleman, aña 2012 tabata Bertha Willems, aña 2013 tabata Bertha Wolf, na aña 2014 tabata Jeristsa Croes, na aña 2015 tabata Giana Wester, na aña 2016 tabata Jason Kelly y na 2019, Maria Anonieta Ras-Booi tabata e ganado maximo.
Entrada lo ta 10 florin general y carchinan lo ta obtenibel cerca miembronan y participantenan,
Segun Lena tin 5 agrupacion musical cu lo participa y tin ya caba 16 participante cu a inscribi. E agrupacionan cu a inscribi ta:L Un brindis, Tipico Palisia, Grupo di Antanjo Tipico Pegasaya y Tipico Carinjo.
Dia 5 di juli venideron cas di Bernadina lo trek lot. Te cu dia 5 di juli lo tin oportunidad ainda pa inscribi cerca Lena na number di celular 5651145 of cerca Jose Orman na number di celular5614450.
E gruponan cu por participa ta di henter Aruba y no manera tin biaha por pensa cu ta di Brazil so. Bernadina tabata hende di tur hende. E ta mama di Cultura di henter Aruba y a duna presentacion den tur bario na Aruba y hasta internacional. Ora tin festival por a nota cu di tur caminda comunidad ta uni pa bin presencia e festival.
Persey Jeand’or a splica cu henter Aruba por participa na e festival cu cancionnan den nos lenga Papiamento. E ta gradicido tambe cu Chichi Perez cu coro La Escala lo dedica 5 cancion pa habri e festival aki. Tur hende ta bon bini. Segun Persey cu e festival nos ta trece algo di nos cultura y di nos dushi Aruba padilanti. El a gradici y a invita un y tur pa e evento.
Betty Werleman a conta di su experiencia como prome ganado di e festival na aña 2011. A haya oportunidad di canta na desvelo di e borchi di Caya Bernadina Growell-Kock y tabatin e honor di presenta hunto cu Sodo y Cuero e cantica “Ayoo mi Dudu”. Segun Betty “danki na cu mi a gana e festival te awe mi ta integrante di Sodo y Cuero. E experiencia di e festival ta uno di kita sombre paso te awe mi ta den e Parada, mi ta canta y actualmente mi tin un grupo di tambe cu mi subrinonan, cu mi nietonan. Mi ta all the way cu y mi ta gosa semper den tur Parada cultural tambe”.
Maria Antionieta Ras-Booi a gana festival di Bernadina na 2019 cu e cancion di “Bernadina nos mama di cultura”. El a expresa: nos ta invita boso tur pa bin engrandece e festival aki. Mi experiencia den e festival aki tabata super bunita y ta dushi pa canta nos cancionnan di nos hendenan di Aruba. Yega bin haci e festival grandi. Di pariba of pabou, sea bonbini.”
