Minister di Husticia, den cooperacion cu Minister di Asuntonan General, ta anuncia cu den bienestar di eficiencia, spaar gasto y confiabilidad di e proceso en general, cu desde prome di december 2020 e carchi di Rijbewijs Arubano nobo lo wordo traha door di Censo den mesun manera cu e proceso di Cedula ta tuma luga. Pa e motibo aki Censo ta informa e procedura nobo pa emision di e carchi nobo di rijbewijs.
Sharin Luydens, director di Censo y Registro Civil Aruba, a splica e procedura pa un ciudadano sigui pa haya su rijbewijs, cu aworaki ta den man di e departamento aki.
E proyecto no tabata encera solamente un carchi nobo di rijbewijs, sino ful un proceso pa yega na un Registro Central di Rijbewijs, cual tin tur su procesonan na su luga entre otro division sistematico automatico, pa cu e diferente tareanan.
Durante e aña cu a pasa a hinca hopi esfuerso y tempo den esaki, pero tambe a desaroya un sistema cu Cuerpo Policial por registra peticion y resultado di examen rijbewijs. Tambe for di e mesun sistema aki, nan por emiti nan mesun productonan na un manera mas eficiente. Por ehempel un permiso pa practica pa rijbewijs A (oefenvergunning), certificado di autenticidad (echtheidsverklaring), registracion di un combersacion di un rijbewijs stranhero pa uno Arubano (omzetting buitenlands rijbewijs) pa despues Censo por emiti un carchi di rijbewijs Arubano. E criteria importante di e proyecto aki ta pa por otorga un rijbewijs Arubano di un calidad halto y confiabel, no solamente e parti fisico di e carchi pero tambe e parti di proceso.
E fase actual di e proyecto
Na e momentonan aki e ultimo ahustacionnan ta tuma luga pa por haci testnan. Si tur cos bay bon, e intencion ta lo siguiente:
1. Di prome di december pa 11 di december 2020, solamente pa e grupo 60 plussers, cual nan rijbewijs a caduca por haci un cita pa renobacion di nan rijbewijs na e manera indica aki bou. Pa esnan di edad avansa cu no tin habilidad digital, por yama Censo entre 09:00’or cu 11:00’or of 14:00’or y 16:00’or pa nos por haci e afspraak aki pa e persona.
2. Di 14 di december pa 18 di december 2020, solamente pa e grupo cu a pasa nan examen di rijbewijs cual NO a haya oportunidad pa saca nan carchi di rijbewijs ainda. Nan lo por haci afspraak na e manera indica aki bou.
3. Di 21 di december 2020 en adelante lo atende publico en general cu nan rijbewijs a caduca, of lo caduca pronto of cu a pasa nan examen cu exito.
Lo habri afspraaknan riba nos website www.censo.aw/afspraakmaken/ documenten en inlichtingen/aanvraag Arubaans rijbewijs.
Corda atene bo mes na e fechanan ariba indica pa cu e gruponan, pasobra esaki ta e secuencia di gruponan cu lo atende prome.
Rekisitonan cu mester trece:
En todo caso bo mester bin personalmente y trece:
• Afl 50,00 (cash of swipe)
• Bo rijbewijs cu a caduca.
• Carta di Dokter solamente si ta trata di renobacion di rijbewijs. Categoria B-E, C, D . Pa categoria A, of B so, no mester di e carta di dokter. Por cumpra e documento aki na postkantoor pa Afl8,00. Despues mester hiba esaki pa bo dokter di cas. Dokter di cas ta cobra pa yena esaki. E documento aki pa ley ta valido pa 3 siman despues cu dokter firma esaki.
Kico e proyecto aki ta nifica pa e ciudadano?
Dentro di poco bo persona por traha un cita na Censo pa cu emision di bo carchi di Rijbewijs Arubano. Bo lo haya e rijbewijs di biaha manera cu ta e caso caba.
• Na Censo lo saca bo potret y lo tuma bo firma digital.
• Bo lo wak e muestra digital di bo rijbewijs riba un pantaya chikito bo dilanti na e balie.
• Despues cu bo aproba esaki, bo persona ta paga y lo wordo referi na otro balie unda bo persona lo haya e rijbewijs
• Na e balie cu bo ta wordo referi, e Rijbewijs lo wordo imprimi den un par di minuut.
• Bo persona lo wak un recibo digital como prueba di entrega di e rijbewijs riba pantaya. A peticion di e cliente por imprimi e recibo aki riba papel.
• Bo persona lo haya e Rijbewijs y por uz’e di biaha.
Rijbewijs digital
E Reglamento Ministerial nobo pa cu emision di e carchi di rijbewijs Arubano nobo, no solamente ta regla e carchi fisico, sino tambe e posibilidad adicional pa tin un rijbewijs digital. Lo anuncia esaki ora yega asina leu. Esaki na su debido tempo lo trece cu ne cu bo lo por tin bo rijbewijs digital den bo telefon y mustra esaki ora di control di trafico.
Con nos departamento lo procesa e retraso
Manera indica, lo cuminsa cu e grupo vulnerabel prome. Despues lo atende e grupo cu a pasa examen pero ainda no tin ningun Rijbewijs den nan poder. Esaki pa duna Bureau Examen Rijbewijs tempo pa registra e resultadonan den e sistema nobo. Despues lo sigui cu tur cliente cu nan rijbewijs a caduca. Pa casonan extraordinario, p.e. biahe pa exterior cu urgencia, por manda un mail na [email protected].
Tin por lo menos un retraso di 4000 pa 5000 rijbewijs cu a caduca y no por a renoba ainda. Censo lo trata di recupera e retraso aki mas lihe posibel. Ta calcula cu den dos luna di tempo lo por logra esaki. Ta pidi cooperacion di tur hende y den un corto tempo tur hende por tin nan Rijbewijs Arubano na ordo. Na principio por ta cu bo persona lo tin cu warda un tiki mas largo pa haya cita. Di parti di Censo ta pidi clientenan comprension pa esaki. E meta final ta pa Pais Aruba por otorga un Rijbewijs Arubano, na un manera sigur, confíabel, lihe, eficiente y servicial.
