Ta e temporada un biaha mas – sera bo grupo di famia y dirigi boso mes na e campo di Aloe! Aruba Aloe ta bolbe yama bon bini na nos localnan pa su celebracion anual di dia di Himbo y Bandera, “Aruba Nos Orguyo”, riba 18 di maart 2020 na e fabrica, museo y tienda di Aruba Aloe situa na Hato. E bishitantenan lo por disfruta di un variedad amplio di actividadnan, musica y bandanan local en bibo, cuminda y bebida tipico di Aruba y e promocion di dollar pa florin den e tienda di Aruba Aloe di 9or di mainta pa 5or di atardi.
Mirando e popularidad di e evento “Aruba Nos Orguyo” aña pasa, e team di Aruba Aloe a haci tur cos posibel pa garantisa cu e edicion di e aña aki por acomoda e multitud adecuadamente. Jessica Posner, Marketing Manager di Aruba Aloe ta splica: “Nos promocion di dollar pa florin a bira hopi popular den nos communidad local y e aña aki nos tin dos tienda enbes di un pa ofrece asina un espacio mas grandi y amplio cu mas cashier, loke cu mester evita fila largo locual a wordo experencia aña pasa. Tambe nos lo tin e aña aki mas sombra, mas area di parkeo, mas cuminda. Nos kier pa e aña aki ta perfecto pa tur nos bishitantenan.”
E actividadnan lo inclui planta bo mesun mata di Aloe, traha bo mesun ‘Aloe slime’, traha bo mesun banderin, diferente wega, dino jumps, core den trein riba nos campo di Aloe y e Factory & Museum Tours cu ta gratis cual ta enfoca riba e historia di Aloe na Aruba y ta mustra e proceso completo di fabricacion, desde e cortamento na man di e blachinan di Aloe te cu e producto final.
Varios banda local lo sigura un ambiente festivo durante e evento aki cu musica live henter dia, inlcuyendo Sodo y Cuero cu lo cuminsa 9.30AM, Rincon Boys cu lo sigui 12or y pa finalisa, TSUNAMI cu lo cuminsa 2.30PM. Mientras cu nos bishitantenan ta disfruta di e musica di nos musiconan talentoso, nan por disfruta di diferente batido fresco, cuminda tipico di Aruba, lion fish, platonan vegano y vegetariano y mucho mas. Tene na cuenta cu tur esnan cu ta bende cuminda lo tin un desayuno pa ofrece e dia aki pa asina tin un variacion amplio di cuminda pa esnan cu bin trempan, sin conta cu lo tin diferente cuminda pa durante henter e dia.
E promocion di dollar pa florin lo ta henter dia y ta aplicabel riba tur producto di Aruba Aloe. Posner ta sigui bisa: “Cu nos promocion di dollar pa florin, nos ta hopi orguyoso di por duna nos localnan e oportunidad di cumpra den gran cantidad nan productonan favorito di Aruba Aloe, cual a bira definitivamente e orguyo di Aruba.” E personanan cu kier cumpra e dia aki ta haña oportunidad pa gana premionan increibel manera entre otro weekend-stays, un dia riba Palm Island pa dos persona. Esnan cu cumpra prome cu 11or riba e dia aki lo ricibi un tas gratis di Aruba Aloe y mucho mas.
Sigura bo mes di hasi “Aruba Nos Orguyo” parti di bo famia su celebracion di dia di Himno y Bandera!
Aruba Aloe, cual a wordo estableci na 1890, ta un di e poco compañianan di Aloe na mundo cu ta crese, cosecha y procesa su Aloe na e mesun lugar. E Aloe, cual ta wordo considera e miho Aloe di mundo, ta e base di un coleccion di producto pa cuido pa cuero, solo y cabey, cual constantemente ta creciendo. Aruba Aloe awor aki tin 16 tienda aki na Aruba, y su productonan ta obtenibel pa wordo cumpra riba www.arubaaloe.com (Merca & Canada) y na www.arubaaloe.nl (Europa).
