Catalogo di Pintura di Indjan riba Baranca ta bay Scol

Fundacion 1403 ta organisa un campaña pa tur scol na Aruba por haya un catalogo di pintura di Indjan riba baranca pa nan biblioteca. Na nomber di cada persona cu cumpra un catalogo den e periodo cuminsando diasabra dia 23 di november te cu diasabra dia 30 di november, Fundacion 1403 lo regala un buki na un scol.

E campaña ta inicia cu un ‘pop-up’ di Fundacion 1403 na Baz-Rrr den Centro di Oranjestad diasabra dia 23 di november cuminsando pa 11 or. Cada persona cu cumpra un buki lo haya un sticker cu lo plak den un otro buki cu Fundacion 1403 lo entrega na un scol na nan nomber. Esaki ta un Evento di Partnership Comunitario (‘Community Partnership Event’) den contexto di e Metanan di Desaroyo Sostenibel (‘Sustainable Development Goals’), cual Baz-Rrr ta promove activamente. Coautor di e catalogo, Harold Kelly, kende ta arkeologo di Museo Arqueologico Nacional Aruba y Francisco Croes, e persona na kende e buki ta dedica, lo t’ey pa comparti nan experiencia di traha e catalogo aki y firma buki. E evento na BazRrr lo dura te 5 or.

Cu cada compra di e catalogo, den e periodo di 23 pa 30 di november, na Plaza Bookshop, na DeWit & VanDorp na Dakota, na Bruna bookstore y na Museo Arqueologico Nacional Aruba, lo haya un sticker pa pone nomber. Na final di e campaña, Fundacion 1403 lo entrega tur scol un buki pa nan biblioteca y lo publica tur detaye riba su pagina di Facebook.

Si tin compania cu ta desea di cumpra mas copia di e buki, nan por tuma contacto cu Fundacion 1403 via nan e pagina di Facebook @fundacion1403, email: [email protected] of bishita e ‘pop-up’ na Baz-Rrr.

E catalogo di pintura di Indjan di Aruba ta un proyecto colaborativo entre Fundacion 1403 y Museo Arqueologico Nacional Aruba cu sosten di Prins Bernhard Cultuurfonds Dutch Caribbean, UNOCA, VNO, Gomez & Coffie, FCCA y Grant Thornton. Desde cu a presenta e buki na juli ultimo el a haya masha hopi elogio y ta disponible den librerianan y na Museo Arqueologico Nacional Aruba pa 90 Florin.