Casa del Mar Beach Resort a celebra su 40 aniversario cu un encuentro especial cu a reuni cuater ex-General Manager di e resort. E celebracion a ofrece oportunidad pa comparti recuerdonan, renoba amistad y reflexiona riba cuater decada di hospitalidad na Aruba.
Entre e ex-General Managernan presente tabatin Jan van Nes, Andy Osborne, Aisa van der Biezen y Darin Crouch cu tambe a comparti su experiencianan di e periodo cu el a dirigi e resort. Raymond Maduro, e visionario y desaroyador tras Casa del Mar, tambe a presencia e evento.
Pa esnan cu a forma parti di e historia di Casa del Mar, e anochi tabatin un significado special. E encuentro a trece diferente anecdota y logro bek na memoria, cu a mustra tanto e ambiente familiar como e dedicacion di e ekipo durante e añanan.
Un di e ex-General Managernan a recorda un chiste di prome di april cu a provoca hopi reaccion entre e miembronan di e resort. Den e prome añanan di internet, Casa del Mar tabatin un plataforma online caminda e miembronan por a lesa anuncio y comparti informacion.
Riba e plataforma aki, el a publica cu Casa del Mar lo construi un wiel gigante den e parkeerplaats di e resort. Aunke tabata un chiste di prome di april, e anuncio a causa cu e telefoonnan a cuminsa zona sin stop. Te ainda, e recuerdo ta trece un sonrisa.
Un otro momento memorabel tabata e resultado di un inspeccion di hotelnan na Aruba. Segun e ex-General Manager, durante su periodo Casa del Mar a obtene un puntuacion di 87%, cu a pone e resort na prome luga na e momento ey.
El a atribui e logro na e dedicacion y trabou duro di e personal, y a describi esaki como un di e momentonan di mayor orguyo di su trayectoria na Casa del Mar.
Tambe Darin Crouch a expresa un gradicimento special na Andy Osborne y Aisa van der Biezen pa e apoyo cu nan a ofrece durante su periodo como General Manager. El a destaca cu nan contribucion tabata esencial pa e exito cu el a logra den e resort.
E celebracion di 40 aña a reuni diferente generacion di liderazgo cu a contribui na e trayectoria di Casa del Mar. Cu recuerdonan, anecdota y reconocimiento pa e personal, e encuentro a marca un capitulo special den e historia di e resort y su comunidad.
