Brian Koolman a midi e opinion publico durante Parada di Luz na San Nicolas. Carnaval 66 ta laaf? Publico ta opina.
Junior Rafini
Mi ta 100% di acuerdo cu e interes pa parada ta menos. Kisas door cu e carnaval ta chikito of costo di bida ta hopi halto, unda tin un Gobierno cu a priminti hopi pero a sigui suta pueblo cu medida. Kisas esey a hunga un rol cu na banda ta bashi, gruponan no ta mesun grandi manera antes.
Eleccionnan dia pa dia tin menos participante. E tin su efecto.. Miho cos cera paz y traha cu otro. Ami semper tabata na fabor pa pone SAC traha hunto cu SMAC. Of traha un board completamente di pueblo cu representante di cada grupo pa hiba e carnaval su dilanti. Un coalicion, mescos cu den Gobierno, lo yuda.
Ina Figaroa Maduro (Chica Candela)
Ami sigur ta kee cu e interes pa carnaval ta hopi menos e aña’ki. Mi ta kere cu falta hopi premio, Tambe mi ta kere cu mester trece Tecla y Susanita Diaz bek, nan ta hendenan cu experiencia. Nada contra SMA pero mester duna Cesar loke ta di Cesar. Antes e cos aki no tabata pasa. Ta dushi pa mira e hendenan cu ta organisa carnaval ta cana den e parada. Nos mester traha pa engrandece e carnaval di Aruba. Mira con Noord ta bayendo, tene cuidao pasobra Noord lo crece. Wak e parada di Playa di mucha, si Noord su grupo no a presenta lo no tabatin carnaval. E otronan por cuminsa na join Noord. Trece Tecla bek. Nan ta bakia riba nan tereno.
Melvin Richardson
E aña’ki e carnaval t’ey berdad pero e hendenan no ta participando manera aña pasa. Na 2019 tabatin hopi mas hende. Tin hende riba caya pero no ta hopi. Aña pasa a bende bon pero e aña’ki e tabata menos. Tur cos ta caro. No tin cen y fin di luna no a yega ainda. Sigur e aña’ki tin menos hende banda di caminda. Prijsnan mester baha bek, tur cos ta demasiado caro, cuminda y bebida.
Mochito Werleman
Mi ta kere hopi hende na banda ta critica. Ami lo bisa: Bay den dje,. Si bo para na banda critica bo ta yuda engrandece un poco mas. Si bo para na bda y critica, e ta keda mescos. Pero ta berdad cu tin menos hende na banda tam be pa wak e paradanan. E gruponan mester cera cabes y mira con pa engrandece e carnaval di Aruba.
Juni Jones
CU tin menos hende ta bay wak of participa den parada, mi ta kere cu economia di Aruba ta hunga un rol importante den esaki. E carnaval tabata cortico y hopi hende no a haya e “fever” di carnaval ainda. Mi ta kere cu pa fin di siman e ambiente lo ta bek. Tin mucho parada y ta mira e mesun cos y e hendenan no ta bin wak tur cos mescos. Menos parada, awo ta casi tur bario tin parada. E no tin sentido.
Lando Holsman
Pa mi tur aña e ta mescos. E ta bashi tempran pero mas laat e ta yena. Esun di mucha si tabata bashi. Kisas mester pone prijs mas barata y si bo tin tres yiu, e ta Sali hopi caro.
